विराटनगर । कोशी प्रदेशका मुख्यमन्त्री हिक्मतकुमार कार्कीले पुनः प्रदेशसभाबाट विश्वासको मत लिने भएका छन् ।
यसअघि नेकपा माआवादी केन्द्रको समर्थनमा कार्की मुख्यमन्त्री भएका थिए । राष्ट्रिय राजनैतिक समीकरणको फेरबदलसँगै कोशी प्रदेश सरकार पनि फेरिएपछि पुनः विश्वासको मत लिने तयारीमा रहेका छन् मुख्यमन्त्री कार्की ।
मुख्यमन्त्री कार्कीले असोज २ गते प्रदेशसभाबाट विश्वासको मत लिने भएका हुन् । माओवादी केन्द्रको समर्थनमा मुख्यमन्त्री बनेका कार्कीलाई माओवादी केन्द्रले समर्थन फिर्ता लिएपछि दोस्रो पटक विश्वासको मत लिन लागेका हुन् ।
साउन ११ गते माओवादीले कोशी प्रदेशको सरकारबाट बाहिरिए पनि भदौ १४ गते मात्रै माओवादीले कार्कीलाई दिएको समर्थन फिर्ता लिएको थियो । सत्ता गठबन्धन परिवर्तन भएपछि अहिले कोशी प्रदेशमा नेकपा एमालेको नेतृत्वमा बनेको सरकारमा काँग्रेस सहभागी छ ।
संविधानको धारा १६८ (५)अनुसार मुख्यमन्त्रीमा नियुक्ति भएका कार्कीले दोस्रो पटक विश्वासको मत लिन लगेका हुन् । ९३ सदस्यीय कोशी प्रदेशसभामा मुख्यमन्त्री कार्कीको दल नेकपा एमालेका ४० सांसद छन् भने सत्ताघटक काँग्रेसका २० सांसद छन् ।
प्रदेशसभामा माओवादी केन्द्रका १३, राप्रपाका ६, नेकपा एकीकृत समाजवादीका ४ र जसपाका १ सांसद छन् । गत वैशाख २७ गते मुख्यमन्त्री नियुक्त भएका कार्कीले पहिलो पटक वैशाख ३१ गते विश्वासको मत लिएका थिए ।

























