
विराटनगर । नेकपा (माओवादी केन्द्र)ले कोशी प्रदेश सरकारलाई विश्वासको मत दिन नसकिने स्पष्ट पारेको छ ।
मुख्यमन्त्री हिक्मतकुमार कार्कीले विश्वासको मत मागेपछि माओवादी केन्द्रले उनलाई विश्वासको मत नदिने उल्लेख गरेको हो । ‘भ्रष्टहरुद्वारा निर्मित सरकार हो यो । जनताद्धारा होइन, केन्द्रको पनि प्रदेशको पनि,’ माओवादी प्रदेशसभा सदस्य गणेशप्रसाद उप्रेती ‘सुशील’ले भने, ‘भ्रष्टद्धारा निर्मित सरकारलाई विश्वास दिन सकिँदैन । त्यस कारण हाम्रो दलबाट सरकारले विश्वासको मत पाउँदैन । सरकारप्रति हाम्रो दललाई विश्वास छैन ।’
माओवादी केन्द्रले सुरु गरेको जनयुद्धलाई हिंसा देख्ने दलले विश्वासको मत माग्नु हास्यास्पद भएको उप्रेतीले बताए । ‘सुसासनका लागि बनेको भए हामी पनि सहयात्री हुनसक्थ्यौं, ‘उनले भने ,‘सरणार्थी प्रकरणको छानविन गर्ने प्रहरीलाई रातारात हटाइयो । राष्ट्रिय रुपमबाट स्थापित भ्रष्टाचारका फाइल गायब भइरहेका छन् । सरकारले आफ्नो गति देखाउन थालिसकेको छ ।’
सरकारले जनताको सेवा नगर्ने बताउँदै उनले सरकारलाई माओवादीले समर्थन नगर्ने बताए । ‘जतिसक्दो छिटो यो सरकारको विघटन, अन्त्य र समाप्तिबाट मात्रै सुशासन अघि बढ्न सक्छ,’ उप्रेतील भने, ‘यो सरकारलाई हाम्रो समर्थन रहँदैन ।’

























