‘मुटु रोगबाट जोगिन परिश्रम, व्यायाम र खानपानमा ध्यान दिन आवश्यक’

विराटनगर । स्वास्थ्य क्षेत्रका अगुवाहरुले मुटु रोगबाट जोगिन नियमित परिश्रम, व्यायाम र खानपानमा ध्यान दिन आवश्यक रहेको बताएका छन् ।

यो रोग लाग्न नदिन दैनिक शारीरिक परिश्रम, व्यायाम र खानपानमा ध्यान दिनुपर्ने उनीहरुको भनाइ छ । साथै, नियमित रक्तचापको परीक्षण गर्नुपर्ने सुझाव उनीहरुको छ ।

धुमपान, मदिरा, गुलियो तथा चिल्लो पदार्थको त्याग र नुनको मात्रा कम प्रयोग गरेमा मुटु रोगबाट बच्न सकिने अगुवाहरु बताउँछन् ‘काम गरौं, मुटु बचाऔं’ नाराका साथ विश्व मुटु दिवस–२०८१ को उपलक्ष्यमा विराटनगरमा आइतबार प्रभातफेरीको आयोजना गरिएको थियो ।

ग्लेनमार्क फर्मासुटिकलद्वारा विराटनगरको कोशी अस्पताल परिसरबाट निस्किएको प्रभातफेरी हस्पिटल चोक, कालिमन्दिर चोक, जैनमन्दिर चोक, डीएसपी रोड, गोल्छा मोड, डाँफे चोक, सहिद रंगशाला हुँदै पुनः अस्पतालमै पुगेर कोणसभामा परिणत भएको थियो ।

प्रभातफेरीमा चिकित्सक, विभिन्न औषधि उद्योगका प्रतिनिधि, औषधि बिक्री प्रतिनिधि, स्वास्थ्यकर्मी र स्वास्थ्य सेवामा आवद्धहरुको सहभागिता रहेको थियो ।

त्यो अवसरमा वरिष्ठ फिजिसियन डा.दीपक सिग्देल, डा. उत्तर मैनाली, डा. लक्ष्मीनारायण यादव, ग्लेनमार्कका निरजकुमार कर्ण र अन्जेस साहले मुटु रोगबाट हुने मृत्युलाई न्यूनीकरण गर्न हरिया सागसब्जी, दैनिक व्यायाम र समय–समयमा चिकित्सकसँग परामर्श एवं चेकजाँच गर्नुपर्ने बताए ।

नागरिकहरुमा जनचेतना जगाउन विश्व मुटु दिवस मनाउने गरिएको उनीहरुको भनाइ छ । नेपाल सरकारले मुट रोग लागेका दीर्घरोगीलाई १ एक लाख बराबरको उपचार सेवा निःशुल्क गरेको छ । ७५ वर्ष भन्दा माथिका ज्येष्ठ नागरिकलाई निःशुल्क उपचारको व्यवस्था रहेको छ ।