‘नेपालको इलस्ट्रेटिभ एटलस अफक्रेनियल सर्जरी’ पुस्तक बिमोचन

विराटनगर । विराटनगरस्थित आर्या न्यूरो हस्पिटलका प्रबन्धक निर्देशक तथा वरिष्ठ न्यूरो सर्जन डाक्टर पंकजराज नेपालको ‘नेपालको इलस्ट्रेटिभ एटलस अफक्रेनियल सर्जरी’नामक पुस्तक बिमोचन भएको छ ।

सुनसरीको इटहरीमा नेपाल न्यूरो सर्जन समाज (नेसन)को ११ औं राष्ट्रिय सम्मेलनमा डाक्टर नेपालको उक्त पुस्तक बिमोचन गरिएको हो ।

कार्यक्रमका प्रमुख अतिथि कोशी प्रदेशका मुख्यमन्त्री हिक्मतकुमार कार्की, नेपाल न्यूरो सर्जन समाजका अध्यक्ष तथा वरिष्ठ न्यूरो सर्जन डा. यामबहादुर रोकालगायतले संयुक्त पुस्तक बिमोचन गरे ।

डाक्टर नेपालले पुस्तक नेपालमा न्यूरो सर्जरीको क्षेत्रमा अग्रगामी प्राध्यापक डा. उपेन्द्रप्रसाद देवकोटाको शिक्षा र बिरासतको प्रमाण भएको बताए । ‘डाक्टर देवकोटाले आफूपछिका पिढीलाई सिकाउने, बुझाउने ज्ञान दिनु भएको थियो । उहाँले दिनु भएको ज्ञान, हजारौंको जीवन बचाउने विकसित अभ्यासहरू जस्ता कुराका साथै अन्य नयाँ विकसित प्रविधि र ज्ञानबारे समेटेर पुस्ताक तयार पारिएको, डा. नेपालले बताए ।

‘यस पुस्तकका दृष्टान्तहरू रेखाचित्रमा मात्र होइन, तिनीहरू मेरो न्यूरो सर्जनको रूपमा यात्राको प्रतिविम्ब रहेको छ,’ उनले भने ।

यी तस्बिरहरू प्रस्तुत गर्न मात्र होइन तर सावधान कलात्मकताको भावनालाई मार्ग दर्शन गर्नका लागि पनि हुन् । जुन हरेक सफल न्यूरो सर्जिकल प्रक्रियामा अन्तर्निहित हुन सक्छ,’ डाक्टर नेपालले भने, ‘यस एटलसको प्रारम्भिक अध्यायहरूले प्रभावकारी न्यूरो सर्जिकल प्रविधिहरूको मेरुदण्डको रूपमा महत्वपूर्ण शारीरिक निश्कर्षहरूमा खोजी गर्दछ । क्रेनियल शल्यक्रियाको जटिलताहरू नेभिगेट गर्न चाहने कुनै पनि सर्जनका लागि यी सूक्ष्मताहरू बुझ्न आवश्यक छ । त्यसपछिका अध्यायहरू क्रेनियल ट्रमा, न्यूरो भास्कुलर र ब्रेन ट्युमरको व्यवस्थापनमा प्रयोग गरिने विभिन्न शल्यचिकित्सा प्रविधिहरूमा समर्पित छन् ।’

प्रत्येक प्रविधिलाई स्पष्ट, व्यावहारिक मार्ग दर्शन प्रदान गर्ने उद्देश्यले विस्तृत रूपमा व्याख्या गरिएको उनले बताए । साथै प्रोफेसर देवकोटाको दृष्टिकोणको शिक्षा पनि पुस्तकमा सुरक्षित राखिएको डाक्टर नेपालले बताए ।

कार्यक्रममा नेपाल न्यूरो सर्जन समाजका अध्यक्ष डाक्टर यामबहादुर रोकाले इलस्ट्रेटिभ एटलस अफक्रेनियल सर्जरी पुस्तकले न्युरो सर्जनका लागि बहुमूल्य स्रोतको रूपमा काम गर्ने बताए ।

डाक्टर नेपालले लेखेको पुस्तकमा समावेश गरेको चित्रहरु उनी आफैले बनाएका हुन् । उनी आर्टप्रति शौखिन छन् ।