
काठमाडौं । राजावादीहरूले काठमाडौंको तीनकुनेमा गरेको हिंसात्मक प्रदर्शनमा परेर २ जनाको मृत्यु भएको छ ।
मृत्यु हुनेमा १ जना पत्रकार र १ जना सर्वसाधारण छन् । घटनामा परेर ८८ जना घाइते भएका छन् । घाइते हुनेमा २२ जना सशस्त्र र ३१ जना नेपाल प्रहरी तथा ३५ जना प्रदर्शनकारी रहेका छन् ।
तोडफोड र आगजनीमा संलग्न ५१ जनालाई प्रहरीले पक्राउ गरेको छ। जिल्ला प्रहरी परिसर काठमाडौंका प्रवक्ता एसपी अपिलराज बोहराका अनुसार शुक्रबार रातिसम्ममा पक्राउ पर्नेको संख्या ५१ रहेको हो ।
पक्राउ पर्नेमा राप्रपा नेताहरु पनि छन् । अपराधिक घटनामा संलग्न अन्यको प्रहरीले खोजी गरिरहेको छ । अमानवीय, अमर्यादित र गैरकानुनी आपराधिक गतिविधिमा संलग्न भएकालाई पक्राउ गरिएको एसपी बोहराले बताए ।
प्रहरीका अनुसार सरकारी ९ वटा तथा निजी ६ वटा सवारीसाधन गरी जम्मा १५ वटा गाडी तोडफोड गरिएको छ । विभिन्न व्यापारिक भवनमा पनि तोडफोड र आगजनी गरिएको छ ।
उत्तेजक बनेको भिडले सर्वसाधारणको घरमा आगजनीसमेत गरेको छ । विभिन्न १४ स्थानमा आगजनी भएको प्रहरीले जनाएको छ । ९ वटा संस्था तथा कार्यालयमा तोडफोड गरिएको छ ।

























