
काठमाडौँ । राजावादी समूहहरूले काठमाडौँको तीनकुने घटनामा पक्राउ परेकाहरूलाई आगामी वैशाख २१ गतेभित्र रिहा नगरिए सामूहिक गिरफ्तारी दिने चेतावनी दिएका छन् ।
राजसंस्था पुनःस्थापनाका लागि संयुक्त जनआन्दोलन समितिका कार्यवाहक अध्यक्ष जगमान गुरुङले आज (बुधबार) पत्रकार सम्मेलन गरी तीनकुने घटनापछि नजरबन्दमा रहेका समितिका अध्यक्ष तथा पक्राउ परेका नेताहरूलाई मुक्त गर्न सरकारलाई अगामी वैशाख २१ गतेसम्मको समय दिएको बताए ।
उनले राजसंस्था स्थापनाका लागि विभिन्न कार्यक्रम समेत गर्ने जानकारी पनि दिए । राजावादीहरूले चैत १५ गते तीनकुनेमा गरेको प्रदर्शनका क्रममा तोडफोड, आक्रमण र आगजनी गरेका थिए । घटनामा दुई जनाको मृत्यु भएको थियो ।
घटनामा संलग्न ७५ जनालाई पक्राउ गरेर प्रहरीले अनुसन्धान जारी राखेको छ । प्रदर्शनकारीले सरकारले नै घुसपैठ गराएर आन्दोलनलाई हिंसात्मक बनाएको आरोप लगाउँदै आएका छन् ।

























