
विराटनगर । मोरङको सुनवर्षी नगरपालिका–३ मा ट्याक्टरले मोटरसाइकललाई ठक्कर दिएर दुर्घटना हुँदा राष्ट्रिय युवा संघ नेपाल सुनवर्षी नगर कमिटीका सचिव भूपेन्द्र कटुवालको मृत्यु भएको छ ।
प्रहरीका अनुसार सुनवर्षीबाट खैरबारीतर्फ जाँदै गरेको प्र १–०२–००३ त ०७५२ नम्बरको ट्याक्टरले कटुवाल सवार प्र १–०४–००१ प ४०११ नम्बरको मोटरसाइकललाई शुक्रबार साँझ ६ः३० बजेतिर ठक्कर दिएको थियो । दुर्घटनामा परेर गम्भीर घाइते भएका उनलाई उद्धार गरेर उपचारका लागि विराटनगरको न्युरो अस्पताल पठाइएको थियो ।
अस्पताल पुर्याउनसाथ चिकित्सकले राति ८ः३७ बजेतिर मृत घोषित गरिदिएको प्रहरीले जनाएको छ । सुनवर्षी–३ घर भएका कटुवाल राष्ट्रिय युवा संघ नेपाल सुनवर्षी नगर कमिटीका सचिव हुन् ।
साथै पत्रकारिता पनि गर्दै आएका थिए । पत्रकार किशोर विश्वकर्माका अनुसार कटुवालले सारथि स्टार नामक अनलाइन चलाउँदै आएका थिए । कटुवाल अन्य सञ्चारमाध्यममा समेत आबद्ध रहेको विश्वकर्माको भनाइ छ ।
दुर्घटनालगत्तै प्रहरीले ट्याक्टर र चालक सुनवर्षी–४ का २९ वर्षीय सञ्जितकुमार महतोलाई नियन्त्रणमा लिएर घटनाको अनुसन्धान सुरु गरेको हो । ट्याक्टर चालकको लापरबाहीले दुर्घटना भएको प्रहरीको प्राम्भिक अनुसन्धानबाट खुलेको छ ।

























