
दमक । प्रधानमन्त्री तथा नेकपा (एमाले) का अध्यक्ष केपी शर्मा ओलीले परिवर्तन ल्याउँछु भनेर चैत १५ गते सडकमा निस्केकाहरूले रक्सीको बोतल चोरेको टिप्पणी गरेका छन् ।
झापाको दमकमा पार्टीद्वारा शनिवार आयोजित जनजागरण सभालाई सम्बोधन गर्दै उनले यस्तो टिप्पणी गरेका हुन् ।
त्यस्ता अराजक गतिविधि अब सह्य नहुने उल्लेख गर्दै ओलीले भने, ‘देशमा परिवर्तन ल्याउँछ भनेर सडकमा निस्किने अनि पसलमा चोरी गरेर रक्सी बोकेर हिँड्ने ? अब यस्ता कार्य स्वीकार्य हुँदैन।’
राजनीति गर्नै नजान्नेहरूले देश चलाउन खोजेकाले देशले सही मार्ग नलिएको पनि प्रधानमन्त्री ओलीले बताए । उनले एमालेको नेतृत्वमा जुनसुकै बेलाका सरकारले सुधार ल्याएको दाबी गरे ।
विगतमा ढुंगा हान्नेहरूले देश चलाउन थालेकाले देश उँभो नलागेको प्रधानमन्त्री ओलीको दाबी थियो । राजनीति अस्थिर भएपछि अनेक खालका मान्छे निस्किएको उनको भनाइ थियो ।
‘बैंक डुबाउनेहरू आए। ऋण नतिर्नेहरू आए । जनतालाई भड्काउनेहरू आए तर उनीहरूको तमासा पनि चैत १५ गते देखियो’ ओलीले भने ।

























