
विराटनगर । ताप्लेजुङमा बोलेरो गाडी दुर्घटना हुँदा १ जनाको मृत्यु भएको छ । १ जना घाइते भएका छन् ।
प्रहरीका अनुसार फक्ताङलुङ गाउँपालिका–५ याङशीला चोकमा बुधबार दिउँसो १ः३० बजेतिर दुर्घटना भएको हो । लेलेपबाट तापेथोकतर्फ जाँदै गरेको मे १ च ५१९३ नम्बरको बोलेरो आफैं अनियन्त्रित भएर सडकबाट करिब ३ सय मिटर तल खसेको थियो ।
दुर्घटनामा बोलेरो चालक पाँचथरको फिदिम नगरपालिका–३ का २५ वर्षीय सरोज श्रेष्ठको मृत्यु भएको प्रहरीले जनाएको छ । गम्भीर घाइते उनको उपचारका क्रममा आधारभूत स्वास्थ्य चौकी तापेथोकमा दिउँसो ३ः५५ बजेतिर मृत्यु भएको हो ।
दुर्घटनामा परेर फिदिम–३ का सौजन श्रेष्ठ घाइते भएका छन् । गम्भीर अवस्थाका उनलाई थप उपचारका लागि जिल्ला अस्पताल ताप्लेजुङ पठाइएको छ । प्रहरीले घटनाको अनुसन्धान थालेको छ ।

























