
विराटनगर । कोशीका प्रदेशसभा सदस्य (प्रदेश सांसद)लाई कृत्रिम बौद्धिकता (एआई) सम्बन्धी तालिम दिइएको छ ।
नेकपा (एमाले) प्रदेश संसदीय दलले एमालेका प्रदेशसभा सदस्यहरु र स्वकीय सचिवहरुलाई बिहीबार तालिम दिएको हो । नयाँ प्रविधिका बारेमा जानकारी पाउँदा सांसदहरु उत्साहित बनेको एमाले प्रदेश संसदीय दलका प्रमुख सचेतक विदुरकुमार लिङथेपले बताए ।
एआईका सम्बन्धमा अझै विस्तृत तालिम आवश्यक रहेको उनको भनाइ छ । सांसदहरुले विकसित प्रविधिका बारेमा जानकार हुन आवश्यक रहेको बताएका छन् ।
प्रदेश सांसद किशोरचन्द्र दुलालले अहिलेको समयमा नयाँ प्रविधिलाई प्रयोग गर्दा उपलब्धि हासिल गर्न सकिने बताए । तालिम उपलब्धिमूलक भएको उनको भनाइ छ ।
प्रदेश सांसद र स्वकीय सचिवहरुलाई एआईका बारेमा आधारभूत जानकारी र दैनिक जीवनमा काम लाग्ने केही एआई ‘टुल्स’का बारेमा प्रयोगात्मक अभ्यास गराइएको प्रशिक्षक लीलाराज भट्टराईले बताए । सामाजिक सञ्जाल प्रयोगको अवस्था, औचित्य र सावधानीका बारेमा पत्रकार हिमाल दाहालले प्रस्तुति दिएका थिए ।

























