
काठमाडौं । नेपाल यू १९ विश्व कपमा छनोट हुन असफल भएको छ । आइसिसी यू १९ विश्व कप एसिया क्षेत्र छनोटअन्तर्गत शनिबार (आज) नेपाल र अफगानिस्तानबिचको खेल वर्षाको कारण रद्द भएपछि यात्रामा रोकिएको हो ।
काठमाडौंस्थित मूलपानीको खेल मैदानमा बिहान ९ : ३० बजे सुरु हुनुपर्ने खेल वर्षाको कारण समय सारिएको थियो । तर, भिजेको मैदानमा खेल हुन नसक्ने अम्पायरले निर्णय गरेसँगै अफगानिस्तान विश्व कपमा छनोट भयो ।
अर्को वर्ष जिम्बाबे र नामिबियामा हुने आइसिसी यू १९ विश्व कपमा प्रवेशका लागि नेपालले अफगानिस्तानलाई हराउनै पर्ने थियो ।
नेपालको ९ औँ पटक विश्व कप खेल्ने सपना पूरा हुन सकेन । यसअघि नेपालले ८ पटक विश्व कप खेलेको छ । नेपाल र अफगानिस्तानले समान ३ खेल जितेर ६ अंक बनाएका थिए ।
तर, रन रेटका आधारमा अफगानिस्तानले छनोट भयो ।



















