जो पाथीभरा नपुगी बाटैमा अस्ताए

Share this
717shares
मुलुकी खबर
किशोर बुढाथोकी
clock२०८२ बैशाख ८, सोमबार २०:५१

विराटनगर । ललितपुर महानगरपालिका–१० की ४५ वर्षीया सविना पौडेल छोराछोरी र बुवाआमालाई लिएर प्रसिद्ध धार्मिक तीर्थस्थल पाथीभरा दर्शनका लागि आइतबार साँझ ताप्लेजुङ सदरमुकाम फुङलिङ पुगेकी थिइन् ।

अबेर पुगेर उनीहरु फुङलिङस्थित होटल प्यारिजमा बास बसे । सविनासँगै छोरा १० वर्षीय भविमय आचार्य, छोरी १६ वर्षीया आध्या आचार्य, माइतीका बुवा झापा भद्रपुर नगरपालिका–१५ का ७० वर्षीय विनोद पौडेल र आमा ६९ वर्षीया सरिता पौडेल थिए ।

बास बसेपछि सविनाले होटल सञ्चालक सविन बानियाँलाई बिहान काफ्लेपाटीसम्म पुग्ने गाडी व्यवस्थापन गरिदिन आग्रह गरिन् । सविनले आफ्नै बोलेरो जिप चलाउने गरेका फुङलिङ नगरपालिका–१० का ४२ वर्षीय दुर्गा भट्टराईसँग सम्पर्क गराइदिए ।

सोमबार बिहान मन्दिरमा पूजा गर्ने गरी पुग्ने र दिउँसो फर्किने योजना उनीहरुको थियो । चालक भट्टराई बिहान ३ बजेतिरै मे १ च ३०११ नम्बरको बोलेरो जिप लिएर होटलमा पुगे। सविनाको टोली तयारी भएर निस्किँदा ३ः३० जति भयो ।

फुङलिङ नगरपालिका–१० तेर्सेको सेवारो चोक भन्ने स्थानमा पुग्दा सडकमा खाल्डाखुल्डी थियो । वर्षौंदेखि त्यही रुटमा गाडी कुदाइरहेका चालक भट्टराईले सडकको खाल्डो छल्दै बिजुलीको खम्बा नजिकबाट गाडी अगाडि बढाए ।

बिजुलीको तार माथिबाट लत्रिएर झरेको पत्तै पाएनन् । हाइटेन्सन लाइनको करेन्ट प्रवाह भइरहेको तारले छुनसाथ गाडीमा विद्युत प्रवाह भयो । करेन्ट लागेपछि बिहान ५ बजेतिर गाडीमा आगो दन्किन थाल्यो । भित्र रहेकाहरुले ज्यान जोगाउनका लागि निस्किएर भाग्ने मौकासमेत पाएनन् ।

आगलागीमा परी चालक भट्टराईसहित सविनाका छोरी आध्या, बुवा विनोद र आमा सरिताको घटनास्थलमै मृत्यु भएको ताप्लेजुङका प्रहरी प्रमुख डीएसपी रवि रावलले बताए । जसोतसो सविना गाडीबाट ओर्लिन भ्याइन् भने छोरा भविमय अलि छिटो निस्किएकाले कम चोट लागेको छ ।

सविनाको शरीरका अधिकांश भाग जलेको छ । उनको अवस्था गम्भीर र छोराको सामान्य छ । ताप्लेजुङ अस्पतालमा प्राथमिक उपचारपछि थप उपचारका लागि आमा–छोरालाई हेलिकोप्टरबाट काठमाडौं पठाइएको डीएसपी रावलले बताए ।

काठमाडौंको ह्याम्स अस्पतालमा चिकित्सक रहेका सविनाका पतिले हेलिकोप्टरबाट घाइते अवस्थाका पत्नी र छोरालाई काठमाडौं लगेका हुन् । पाथीभरा दर्शन गर्न आमाबुवा र छोराछोरीलाई लिएर गएकी सविनाले ठूलो घात बेहोर्नु परेको छ ।

परिवारमा ठूलो बज्रपात परेको छ । उनले छोरी र बुवा–आमा गुमाइन् । आफू पनि सिकिस्त घाइते भएकी छन् । छोरा सामान्य घाइते छन् ।

फुङलिङ–१० का वडाध्यक्ष सन्तोष लिम्बूले पाथीभराको काखमा दुःखद् घटना भएको बताए । ‘तीर्थयात्रा गर्न जाँदा यस्तो कहालीलाग्दो घटना भोग्नु पर्नेछ भन्ने कसले कल्पना गरेको हुन्छ ? तर, बिचरा बयान गर्नै नसक्ने गरिको पीडादायी घटना भयो । जो तीर्थयात्रीहरु पाथीभरा नपुगिकन बाटैमा अस्ताए,’ उनी भन्छन् ।

घटना हुनुमा विद्युत प्राधिकरण र सडकको गम्भीर लापरबाही देखिएको लिम्बूको भनाइ छ । विद्युत विस्तार गर्दा लत्रिएको तारले गाडीमा छुँदा दुर्घटना भएको उनी बताउँछन् ।

‘घटनाको प्रकृति हेर्दा विद्युत प्राधिकरणको लापरबाही देखिएको छ । पोलमा राम्रोसँग ‘बेन्डिङ’ नभएकाले तार लत्रिएर भुइँमा झरेको रहेछ । ‘बेन्डिङ’ मजवुत भइदिएको भए दुःखद् घटना हुँदैन थियो । यहाँ सडकको कमजोरी पनि देखियो । सडक विस्तारका क्रममा पानी जमेर खाल्डो भएको थियो । खाल्डो पुरेर सडक मिलाउने काम भएको रहेनछ । सडकको भित्तातर्फ २ फुटजति पानी जमेको पाइयो । त्यो खाल्डोबाट गाडीलाई तर्काउन खोज्दा लत्रिएर भुइँमा झरेको बिजुलीको तार गाडीको हुटमा अड्किएर घटना भएको पायौं,’ वडाध्यक्ष लिम्बू भन्छन् ।

गाडीमा आगो दन्किएको देखेर पाथीभरा मन्दिर जाँदै गरेका अरु तीर्थयात्रीले  घाइतेहरुको उद्धार गरेको जानकारी उनले दिए । विद्युत प्राधिकरण र सडकको लापरबाहीका विषयमा जिल्ला प्रशासनसँग छलफलसमेत भएको उनले बताए । विद्युत प्राधिकरणसँग छलफल पनि भएको थियो ।

छलफलका क्रममा मृतकका परिवारलाई उचित क्षतिपूर्ति दिनुपर्ने, घाइतेको निःशुल्क उपचार हुनुपर्ने, मृतकका सन्तानलाई कक्षा १२ सम्म निःशुल्क शिक्षाको व्यवस्था गर्नुपर्ने र मृतक जिप चालककी पत्नीलाई विद्युत प्राधिकरणमा रोजगारीको व्यवस्था गर्नुपर्ने विषय उठेको जानकारी वडाध्यक्ष लिम्बूले दिए । उनका अनुसार जिप चालक भट्टराईका परिवार उनीसँगै आश्रित थिए । ‘पत्नी र छोरा–छोरी छन् । जिप चालक भट्टराईले नै परिवार धान्दै आएका थिए,’ उनले भने ।

माग पूरा नभएसम्म जिप चालक भट्टराईको शव जिम्मा नलिने परिवार र आफन्तको अडान रहेको लिम्बू बताउँछन् । ‘सम्भवतः माग सम्बोधन हुन्छ होला । छलफल सकारात्मक भएको छ,’ उनले भने । उनका अनुसार जिप चालक भट्टराईबाहेक अरु मृतकको शवको पोस्टमार्टम भइसकेको छ ।

‘पोस्टमार्टम भइसकेका शव आफन्तले मंगलबार जिम्मा लिएर लैजाने तयारी गरेका छन् । जिप चालकको शव भने माग पूरा नभएसम्म पोस्टमार्टम गर्न नदिने तथा जिम्मा नलिने अडानमा आफन्त र परिवारका सदस्य छन्,’ वडाध्यक्ष लिम्बू भन्छन् ।

उनका अनुसार पछिल्लो समय ताप्लेजुङमा यस्ता घटना बढ्दै गइरहेका छन् । केन्द्रीय प्रशारण लाइन पुगेको ताप्लेजुङमा विद्युत विस्तारलाई व्यवस्थित गर्ने विषयमा पनि छलफल भइरहेको जानकारी लिम्बूले दिए ।

तपाइको प्रतिक्रिया
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
विराटनगरमा राति २ बजेसम्म व्यवसाय खोल्न पाइने, अनुमति प्रक्रिया सुरु
भारतीयका परिवार नै मिलेर नेपालमा लागुऔषध ‘सप्लाई’ : मोरङको रंगेलीबाट बुवा, आमा र छोरा पक्राउ
थाइल्यान्डमा एक भवनमा भीषण आगलागी, ११ जनाको मृत्यु
‘साउदीको अमेजनका गोदाममा नेपालीसहितका श्रमिक शोषणमा’
मोरङमा सेप्टिक ट्यांकीभित्र बालकको शव फेला
© 2024 Muluki Khabar. All Rights Reserved. Design & Develop By: Indesign Media Pvt. Ltd.