
विराटनगर । झापामा ट्यांकरको ठक्करबाट मंगलबार बिहान साइकलमा यात्रा गरिरहेका पुजारीको मृत्यु भएको छ ।
पूर्व–पश्चिम राजमार्गअन्तर्गत कनकाई नगरपालिका–८ घाघरा पुलमा बिहान ७ बजेतिर ना ७ प २९९७ नम्बरको ट्यांकरले साइकललाई ठक्कर दिएको थियो । केर्खाबाट बिर्तामोडतर्फ जाँदै गरेको ट्यांकरले सोशी दिशातर्फ जाँदै गरेको साइकललाई ठक्कर दिँदा साइकल यात्री अर्जुनधारा नगरपालिका–५ का अन्दाजी ५५ वर्षीय लेखनाथ सापकोटाको मृत्यु भएको हो ।
झापा प्रहरीका प्रवक्ता डीएसपी खगेन्द्रबहादुर खड्काका अनुसार गम्भीर घाइते भएका सापकोटाको उपचारका लागि लैजाँदै गर्दा बाटैमा मृत्यु भएको हो । मृतक सापकोटा कल्याण केन्द्र सुरुंगाका पुजारी रहेको प्रहरीले जनाएको छ ।
शवलाई पोस्टमार्टमका लागि प्रहरीले प्रादेशिक अस्पताल भद्रपुर पठाएको छ । ट्यांकर र चालक झापाको कमल गाउँपालिका–१ का ४६ वर्षीय भीमबहादुर कोइरालालाई नियन्त्रणमा लिएर प्रहरीले घटनाको अनुसन्धान सुरु गरेको छ ।

























