
विराटनगर । झापाको बुद्धशान्ति गाउँपालिका–१ मा ट्याक्टर दुर्घटना सहचालकको मृत्यु भएको छ ।
बिरिङ खोलाबाट भेटेटार गाउँतिर जाँदै गरेको प्रदेश १–०१–००१ त ८३३ नम्बरको ट्याक्टर आफैं अनियन्त्रित भएर बिहीबार बिहान ११ बजेतिर दुर्घटनामा परेको प्रहरीले जनाएको छ । झापा प्रहरीका प्रवक्ता डीएसपी खगेन्द्र खड्काका अनुसार दुर्घटनामा ट्याक्टरका सहचालक बुद्धशान्ति–१ का २४ वर्षीय प्रेम गुरुङको मृत्यु भएको हो ।
ट्याक्टरको डालाले किचेर गम्भीर घाइते भएका गुरुङलाई प्रदेशिक अस्पताल भद्रपुरमा उपचारका क्रममा चिकित्सकले करिब १ घण्टापछि मृत घोषणा गरेका हुन् । ट्याक्टर चालक बुद्धशान्ति–१ का ३४ वर्षीय गणेश गुरुङलाई नियन्त्रणमा लिएर प्रहरीले घटनाको अनुसन्धान सुरु गरेको छ ।

























