
काठमाडौँ । हेटौँडा-काठमाडौँ जोड्ने भीमफेदी-कुलेखानी सडक खण्डको जुरीखेतमा आइतबार साँझ भएको सुमो दुर्घटनामा ज्यान गुमाउने ६ जनामध्ये ५ जनाको सनाखत भएको छ। काठमाडौँबाट हेटौँडातर्फ आउँदै गरेको ना १ ज १७७८ नम्बरको सुमो सडकबाट करिब १०० मिटर तल खोल्सामा खस्दा यो दुखद घटना भएको हो।
जिल्ला प्रहरी कार्यालय मकवानपुरका अनुसार मृत्यु हुनेमा हेटौँडाका सबिता लम्साल (४० वर्ष), निखिल अग्रवाल (२९ वर्ष) र कृष्णप्रसाद फुँयाल (५६ वर्ष) रहेका छन्। त्यस्तै, भारतको विहार राज्यका अरबिन्द कुमार (५० वर्ष) र रजनिस कुमार (४२ वर्ष) को पनि दुर्घटनामा मृत्यु भएको छ। ज्यान गुमाउने अर्का एक पुरुषको भने अझै पहिचान हुन सकेको छैन।
दुर्घटनामा घाइते भएका सुमो चालक गणेश थापा र १२ वर्षीया अभ्यास लम्सालको चितवनस्थित पुरानो मेडिकल कलेजमा उपचार भइरहेको छ भने अर्की घाइते रिचा चौधरीको हेटौँडा अस्पतालमा उपचार भइरहेको छ। आइतबार साँझ दुर्घटना लगत्तै उद्धार गरी अस्पताल पुर्याइए पनि उपचारका क्रममा उनीहरूको मृत्यु भएको प्रहरीले जनाएको छ।

























