नजिकिँदै निर्वाचन : डिजिटल भ्रम नियन्त्रणमा आयोगको कडाइ, विशेष अनुगमन संयन्त्र बनाउने तयारी

Share this
749shares
मुलुकी खबर
मुलुकी खबर
clock२०८२ पुस २२, मंगलबार ०६:५९

विराटनगर । निर्वाचन नजिकिँदै जाँदा निर्वाचन आयोगले निर्वाचनको स्वच्छता र निष्पक्षतामाथि प्रत्यक्ष असर पार्ने मिथ्या सूचना, भ्रमपूर्ण प्रचार र द्वेषपूर्ण अभिव्यक्तिको जोखिमप्रति गम्भीर चासो व्यक्त गरेको छ ।

सूचना प्रविधिको तीव्र प्रयोगसँगै सामाजिक सञ्जाल र डिजिटल प्लेटफर्ममार्फत फैलिने गलत सूचनाले निर्वाचन आचारसंहिता कार्यान्वयनमै चुनौती थपिरहेको निष्कर्षसहित आयोगले त्यसको न्यूनीकरणका लागि विशेष र प्रभावकारी संयन्त्र निर्माण गर्ने तयारी अघि सारेको छ । विशेष गरेर अहिले आयोगको ध्यान डिजिटल भ्रम नियन्त्रणमा केन्द्रित छ ।

निर्वाचन आचारसंहिता, २०८२ को दफा २६ अनुसार गठित केन्द्रीय आचारसंहिता अनुगमन समितिको पहिलो बैठकले निर्वाचन अवधिभर आचारसंहिता कार्यान्वयनलाई कागजी सीमाभन्दा बाहिर ल्याएर व्यवहारमै प्रभावकारी बनाउनुपर्ने आवश्यकता औँल्याएको हो । विशेषगरी सामाजिक सञ्जाल, अनलाइन पोर्टल, डिजिटल भिडियो तथा सन्देशमार्फत योजनाबद्ध रूपमा फैलाइने मिथ्या सूचना, भ्रामक सामग्री र घृणात्मक अभिव्यक्तिले मतदाताको धारणा प्रभावित पार्ने खतरा बढेकाले त्यसलाई नियन्त्रण गर्न अलग संयन्त्र अनिवार्य भएको निष्कर्ष बैठकको छ ।

आयोगका प्रवक्ता नारायणप्रसाद भट्टराईका अनुसार बैठकमा आचारसंहिता कार्यान्वयनका विद्यमान कमजोरी, प्रविधिको दुरुपयोगबाट सिर्जित चुनौती, नियामक निकायको भूमिका र अन्तरनिकाय सहकार्यका सम्भावित ढाँचामाथि विस्तृत छलफल भएको थियो । छलफलका क्रममा सहभागीहरुले आचारसंहिता कार्यान्वयन दण्डात्मक कारबाहीमा सीमित हुन नहुने धारणा राख्दै सचेतनामूलक, प्रवर्धनात्मक र दण्डात्मक उपायलाई एकसाथ अघि बढाउनुपर्ने आवश्यकता औँल्याएका थिए ।

मतदाता, राजनीतिक दल, उम्मेदवार र सञ्चार माध्यम सबैलाई समेट्ने गरी आचारसंहिताका बारेमा निरन्तर जानकारी प्रवाह, अनुगमन र आवश्यक पर्दा तत्काल कारबाही गर्न सक्ने संरचना निर्माण गर्नुपर्नेमा उनीहरूको जोड थियो । कार्यवाहक प्रमुख निर्वाचन आयुक्त रामप्रसाद भण्डारीले सामाजिक सञ्जाल नियमन आजको निर्वाचन प्रक्रियाको सबैभन्दा संवेदनशील पक्ष बनेको उल्लेख गर्दै आयोगले उपलब्ध सबै संयन्त्रलाई समन्वयात्मक र प्रभावकारी रूपमा प्रयोग गर्नुपर्ने बताए ।

उनले प्रविधिको दुरुपयोग रोक्न आयोग एक्लैले सम्भव नहुने भन्दै सम्बन्धित नियामक निकाय, अनुसन्धान गर्ने संस्था र अभियोजन निकायसँग घनिष्ठ सहकार्य अपरिहार्य रहेको स्पष्ट पारे । निर्वाचनको समयमा फैलिने गलत सूचना तत्काल पहिचान, विश्लेषण र नियन्त्रण गर्न सकिने संयन्त्र नबनेसम्म आचारसंहिता प्रभावकारी रूपमा लागू हुन नसक्ने उनको भनाइ थियो ।

आयुक्त डा. जानकीकुमारी तुलाधरले राजनीतिक दलहरूसँग आवश्यक परामर्श गरेर आचारसंहिता लागू गरिने जानकारी दिँदै निर्वाचन अवधिमा प्रवाह हुने मिथ्या सूचना र भ्रमपूर्ण सामग्री न्यूनीकरणप्रति आयोग सचेत र सक्रिय रहेको बताइन् । उनले डिजिटल माध्यमबाट हुने प्रचार–प्रसारमा जिम्मेवारी र जवाफदेहिताको भावना विकास गराउन दलहरूकै भूमिका महत्वपूर्ण हुने उल्लेख गरिन् ।

अनुगमन समितिका संयोजक निर्वाचन आयुक्त सगुन शमशेर जबराले विगतका निर्वाचनमा देखिएका कमजोरीबाट पाठ सिकेर यसपटक आचारसंहिता कार्यान्वयनमा गुणात्मक सुधार ल्याउने उद्देश्यका साथ आयोग अघि बढेको बताए । निर्वाचनको स्वच्छता र निष्पक्षता सुनिश्चित गर्न सूचना प्रविधिको दुरुपयोगबाट सिर्जित चुनौतीलाई नजरअन्दाज गर्न नसकिने भन्दै आयोग सबै सरोकारवाला निकायसँग सहकार्य गरेर अघि बढ्ने उनले स्पष्ट पारे ।

बैठकमा निर्वाचन आयोगका पदाधिकारीका साथै विभिन्न मन्त्रालयका सचिव र सुरक्षा निकायका प्रमुखहरूको उपस्थिति रहेको थियो । आयोगका अनुसार आगामी दिनमा डिजिटल प्लेटफर्मको निगरानी, सूचना प्रवाहको विश्वसनीयता मूल्यांकन र आचारसंहिता उल्लंघनका घटनामा तत्काल प्रतिक्रिया दिन सक्ने संरचना निर्माणलाई प्राथमिकतामा राखिनेछ ।

तपाइको प्रतिक्रिया
मंसिर ९ गतेदेखि आत्मानन्द गोल्डकप, ८ टिमको सहभागिता
इलामको टोड्केमा वार्षिक एक करोड २० लाखको टमाटर उत्पादन
प्रधानमन्त्री शाहको भारत भ्रमण राजकीय हुने तयारी
बाढीपछिको पुनर्निर्माणमा एडिबीको सहयोग बढाउन नेपालको आग्रह
युरोपबाट रुवान्डासम्म आप्रवासी निष्कासनको नयाँ अभ्यास, पाँच देशको संयुक्त योजना
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
© 2024 Muluki Khabar. All Rights Reserved. Design & Develop By: Indesign Media Pvt. Ltd.