
विराटनगर । इलाममा शुक्रबार साँझ पिकअप गाडीको ठक्करबाट पैदलयात्री वृद्धाको मृत्यु भएको छ ।
रोङ गाउँपालिका–१ लक्ष्मीपुर सिरिसे भित्री सडक खण्डमा मे १ च ५९९९ नम्बरको पिकअपले ठक्कर दिँदा ६४ वर्षीया भीममाया राईको मृत्यु भएको हो । सिरिसेबाट लक्ष्मीपुरतर्फ जाँदै गरेको पिकअपले घाँसको भारी बोकेर आउँदै गरेकी भीममायालाई साँझ ६ः१० बजेतिर ठक्कर दिएको थियो ।
गम्भीर घाइते भएकी उनको उपचारका क्रममा झापाको बिर्तामोडस्थित बी एन्ड सी अस्पतालमा साँझ ७ः४० बजेतिर मृत्यु भएको प्रहरीले जनाएको छ । दुर्घटनालगत्तै प्रहरीले पिकअप र चालक सूर्योदय नगरपालिका–४ का २४ वर्षीय रोशन राईलाई नियन्त्रणमा लिएर अनुसन्धान सुरु गरेको छ ।
पिकअप चालकको लापरबाहीका कारण दुर्घटना भएको प्रहरीको प्रारम्भिक अनुसन्धानबाट खुलेको छ । चालकको साथमा कागजपत्र फेला नपरेको प्रहरीले जनाएको छ ।























