विराटनगरमा सांगीतिक महोत्सव हुँदै

विराटनगर । विराटनगरमा आगामी कात्तिक १० गते म्युजिक फेस्टिबल (सांगीतिक महोत्सव) हुने भएको छ ।

तेस्रो संस्करणअन्तर्गत विराटनगरको मेनरोडस्थित जैन भवनको खुल्ला मैदानमा फेस्टिबल हुने भएको हो । लाइभ इन्टरटेनमेन्टको व्यवस्थापन र संयोजनमा हुने फेस्टिबलमा गायक तथा ब्याण्ड स्वपना सुमन र पूर्ण राईलगायतका कलाकारको प्रस्तुति रहने छ ।

नेपालीहरुको महान चाड दसैं, तिहार र छठ पर्वको समय पारेर आयोजना गरिँदै आएको विराटनगर फेस्टिबलले दर्शकहरुलाई मनोरञ्जन प्रदान गर्नुका साथै सामाजिक सद्भाव बढाउन महत्वपूर्ण सहयोग गर्ने अपेक्षा आयोजकको रहेको छ ।

फेस्टिबलमा स्थानीय परिकारहरुको स्वाद दिन फुडस्टलको व्यवस्था र कार्यक्रम प्रायोजकका केही स्टल रहने म्युजिक फेस्टिबलका संयोजक सन्तोष महत (स्यान्ट्रो)ले बताए ।

कार्यक्रम सम्पन्न गर्न १४ लाख खर्च लाग्ने आयोजकले जनाएको छ । अग्रिम बुकिङ गरेमा टिकट प्रवेश शुल्क २ सय र कार्यक्रमको दिन टिकट शुल्क ३ सय लाग्ने जानकारी आयोजकले दिएको छ ।