मोरङको ग्रामथानमा उपनिर्वाचन : रास्वपाबाहेकका दलहरुले टुंग्याए उम्मेदवार

Share this
721shares
मुलुकी खबर
मुलुकी खबर
clock२०८१ कात्तिक २९, बिहीबार ०७:३०

विराटनगर । मोरङको ग्रामथान गाउँपालिकामा अध्यक्ष पदका लागि उपनिर्वाचन हुँदैछ । स्थानीय तहको उपनिर्वाचन आगामी मंसिर १६ गते हुने छ ।

निर्वाचन नजिकिँदै जाँदा ग्रामथानमा चुनावको चटारो सुरु भएको छ । दलहरुले निर्वाचनलाई आफ्नो प्रतिष्ठाको विषय बनाएका छन् । निर्वाचनको नतिजा आफ्नो पक्षमा पारेर अध्यक्ष जित्ने ध्याउनमा दलहरु केन्द्रित हुँदा चुनावी माहोल गर्माएको छ ।

ग्रामथानको अध्यक्षका लागि अधिकांश दलहरुले उम्मेदवारले टुंगा लगाइसकेका छन् । यद्यपि, स्थानीय निर्वाचनमा पहिलोपटक भाग लिन लागेको राष्ट्रिय स्वतन्त्र पार्टी (रास्वपा)ले भने उम्मेदवार यकिन गरिसकेको छैन । २०७९ को स्थानीय तह निर्वाचनमा भने रास्वपाले भाग लिएको थिएन ।

पूर्वगृहमन्त्रीसमेत रहेका पार्टी सभापति रवि लामिछाने प्रहरी हिरासतमा रहेका कारण पनि उम्मेदवार टुंगो लगाउन ढिला भएको एक नेताले बताए । ‘पार्टी सभापति हिरासतमा हुनुहुन्छ । सभापति पक्राउको विरोधमा सिंगो पार्टी नै आन्दोलित छ,’ उनले भने, ‘त्यही भएर समयमा उम्मेदवार छनोट गर्न सकिएको छैन । चु्नावी गतिविधि पनि सुरु भएको छैन ।’

नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राष्ट्रिय प्रजातन्त्र पार्टी (राप्रपा)समेतका दलले अध्यक्षका उम्मेदवार टुंगो लगाइसकेका छन् । उम्मेदवारले घरदैलो गर्दै मत मागिरहेका छन् । रास्वपा भने टुंगोमा पुग्न सकेको छैन ।

ग्रामथान गाउँपालिकाका अध्यक्ष जयप्रकाश गच्छदारको मृत्यु भएपछि खाली रहेको पदमा निर्वाचन हुन लागेको हो । उनी कांग्रेसबाट गाउँपालिका अध्यक्ष निर्वाचित भएका थिए । कांग्रेसले पार्टीका पूर्वमहासमिति सदस्य बलराम सरदारलाई उम्मेदवार बनाएको छ ।

एमालेबाट तुलसीराम विश्वास, माओवादीबाट नमोनारायण माझी, एकीकृत समाजवादीबाट दिलबहादुर विक र राप्रपाबाट दिनेशकुमार थन्दार अध्यक्षका उम्मेदवार हुन् । उपनिर्वाचनका लागि मंसिर २ गते मनोनयन दर्ता गर्ने कार्यतालिका छ ।

निर्वाचन हुने स्थानीय तहहरूका लागि कात्तिक ३० मा निर्वाचन अधिकृतको कार्यालय स्थापना गर्ने निर्वाचन आयोगको कार्यातालिका छ । आयोगले मुख्य र निर्वाचन अधिकृतहरु तोकिसकेको छ ।

कोशी प्रदेशमा ९ पदका लागि उपनिर्वाचन हुने भएको छ । पालिका अध्यक्ष १, जिल्ला समन्वय प्रमुख १ र वडाध्यक्ष ७ गरेर ९ पदमा चुनाव हुने भएको हो ।

मुलुकभर ४४ पदका लागि उपनिर्वाचन हुने छ । जिल्ला समन्वय समितिका प्रमुख २, गाउँपालिका अध्यक्ष २, उपाध्यक्ष ४, नगरपालिका प्रमुख १ , उपप्रमुख १ र वडाध्यक्ष ३४ पदका लागि चुनाव हुने हो ।

तपाइको प्रतिक्रिया
युरोपबाट रुवान्डासम्म आप्रवासी निष्कासनको नयाँ अभ्यास, पाँच देशको संयुक्त योजना
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
© 2024 Muluki Khabar. All Rights Reserved. Design & Develop By: Indesign Media Pvt. Ltd.