
झापा । प्रथम झापा कप २०८१ को दोस्रो खेल आज आयोजक झापा ११ फुटबल क्लब र राष्ट्रिय जागृति (राजा)क्लब इटहरीबीच हुँदैछ ।
यो सिजन बेलबारी गोल्डकपको विजेता बनेको झापा ११ घरेलु मैदानमा पहिलोपटक उपाधि जित्ने लक्ष्यमा रहेको छ ।
इटहरी गोल्डकपको होम टिम राष्ट्रिय जागृति क्लब मोफसलको लयमा रहेको टिम भएकाले पहिलो जितको खोजीमा हुनेछ ।
शनिबारदेखि सुरु भएको प्रतियोगिताको फाइनल खेल पुस ८ गते हुनेछ । प्रतियोगिताको विजेताले नगद १० लाख तथा उपविजेताले नगद ५ लाख पुरस्कार पाउने आयोजक झापा ११ फुटबल क्लबका अध्यक्ष जलकुमार गुरुङले जानकारी दिए ।
प्रत्येक खेलको प्लेयर अफ द म्याचले १० हजार नगद पाउने छन् । प्रतियोगिताको सर्वाधिक गोलकर्ता १ जना तथा उत्कृष्ट गोलरक्ष्क १ जनालाई ३५ हजार नगद पुरस्कार प्रदान गरिनेछ ।
त्यस्तै, प्रतियोगिताको एक उदीयमान खेलाडीलाई झापा ट्यालेन्ट घोषणा गरेर नगद ३५ हजार रुपैयाँ प्रदान गरिनेछ ।
प्रतियोगिताको सर्वाेत्कृष्ट १ जना खेलाडीलाई ‘मस्ट भ्यालुएवल’ खेलाडी घोषित गरेर नगद १ लाख रुपैयाँ प्रदान गरिने अध्यक्ष गुरुङले जानकारी दिए ।
प्रत्येक दिन एक जना भाग्यशाली दर्शकले महेन्द्ररत्न स्टोर्सको तर्फबाट एक थान टिभी उपहार पाउने छन् ।



















