
झापा । प्रथम झापा कपको दोस्रो क्वाटरफाइनल खेल आज (मंगलबार) राष्ट्रिय जागृति (राजा) क्लब इटहरी र भारतको गोर्खाल्याण्ड टेरिटोरियल अड्मिनिस्ट्रेसन (जीटीए) दार्जिलिङ बीच हुँदैछ ।
पहिलो चरणको खेलमा आयोजक झापा ११ लाई घरेलु मैदानमै हराएर क्वाटरफाइनल प्रवेश गरेको राजा क्लब आज दोस्रो जित निकाल्ने लक्ष्यमा हुनेछ ।
गत वर्ष चैतको इटहरी गोल्डकपमा भारत दार्जिलिङको कञ्चनजंघा फुटबल क्लबलाई टाइब्रेकरमा हराएको राजा क्लब वैशाखमा भएको भीमनारायण गोल्डकपको अन्तिम चारमा पुगेको थियो ।
बाइमा रहेको जीटीए दार्जिलिङ पहिलोपटक झापाली मैदानमा खेल्दैछ । यसअघि मंसिर अन्तिम साता इलाम गोल्डकपमा सहभागी भएको जीटीए एनआरटी काठमाडौंसँग पहिलो खेलमै पराजित भएको थियो ।
प्रतियोगिताको विजेताले नगद १० लाख तथा उपजिेताले नगद ५ लाख पुरस्कार पाउने आयोजक झापा ११ फुटबल क्लबका अध्यक्ष जलकुमार गुरुङले जानकारी दिए । प्रतियोगिताको फाइनल खेल पुस ८ गते हुनेछ ।



















