
काठमाडौं । भारतको कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा मृत भेटिएकी प्रकृति लम्सालको आज साँझ नेपाल ल्याइएको छ ।
भारतस्थित नेपाली दूतावासको सहयोगमा स्थानीय प्रशासन, सुरक्षाकर्मीको समन्वयमा भैरहवा ल्याइएको हाे । प्रकृतिकी फुपू सीता ढकालका अनुसार आज प्रकृतिको शव भैरहवामा रहेको युनिभर्सल मेडिकल कलेजमा राखिनेछ ।
प्रकृतिको शङ्कास्पद मृत्युपछि कलेज प्रशासनले विद्यार्थीलाई गरेको व्यवहारको नेपाल र भारतमा आलोचना भइरहेको छ । चर्को आलोचना पछि कलेजले सार्वजनिक रुपमा माफी मागेको थियो ।
आइतबार अपराह्न २० वर्षीय प्रकृति होस्टलको कोठामा मृत अवस्थामा फेला परेकी थिइन् । सोही साँझबाट विद्यार्थीले उनको न्यायको माग गर्दै प्रदर्शन गरेका थिए । तर, कलेज प्रशासनले प्रदर्शन गरेका विद्यार्थीहरुमाथि उल्टै दमन गर्दै घर पठाएको थियो ।

























