
काठमाडौं । काठमाडौंको कागेश्वरीबाट नक्कली सुन देखाई ठगी गर्ने गरेको आरोपमा २ जनालाई प्रहरीले पक्राउ गरेको छ ।
सिन्धुपाल्चोक बाह्रबिसे नगरपालिका–६ घर भइ भक्तपुरको थिमी नगरपालिका बोडेमा डेरा गरी बस्ने ६२ वर्षीय धनजित तामाङ र सिन्धुपाल्चोक बाह्रबिसे नगरपालिका–४ धार्पाका ४८ वर्षीय दलबहादुर तामाङलाई नक्कली सुन देखाई ठगी गरेको आरोपमा पक्राउ गरेको काठमाडौं उपत्यका अपराध अनुसन्धान कार्यालयले जनाएको छ ।
भक्तपुरका विभिन्न स्थानहरूमा १ महिनादेखि नक्कली सुन देखाई सर्वसाधारणलाई ठगी गर्ने गिरोह सक्रिय रहेको भन्ने सूचनाका आधारमा काठमाडौं उपत्यका अपराध अनुसन्धान कार्यालय, अपराध शाखा भक्तपुर र पीसीसीबी थिमीको संयुक्त टोलीले उनीहरूलाई काठमाडौं कागेश्वरी मनोहरा–६ मुलपानीबाट पक्राउ गरेको हो ।
उनीहरूको साथबाट १ किलोग्राम बराबरको बिस्कुट आकारको पहेंलो धातु १ थान र पिलास १ थान समेत बरामद गरेको छ ।
पक्राउ परेका दुवै जनालाई प्रहरी वृत्त बौद्धमा राखेर थप अनुसन्धान भइरहेको प्रहरीले जनाएको छ ।

























