
विराटनगर । पाँचथरमा विद्यार्थी पुर्याएर फर्किएको सफारी गाडी दुर्घटना हुँदा चालकको मृत्यु भएको छ । २ जना घाइते भएका छन् । घाइतेमध्ये १ जनाको अवस्था गम्भीर र १ जनाको सामान्य छ ।
हिलिहाङ गाउँपालिका–४ ओखरबोटेस्थित भित्री सडक खण्डमा बुधबार साँझ ६ः१५ बजेतिर दुर्घटना भएको हो । माङसेवा बोर्डिङ स्कुलका विद्यार्थी पुर्याएर पञ्चमीबाट भालु चोकतर्फ फर्कदै गरेको मे १ ज ३०७३ नम्बरको सफारी आफैं अनियन्त्रित भएर दुर्घटनामा परेको प्रहरीले जनाएको छ ।
उक्त सफारी सडकबाट करिब सय मिटर तल खसेको थियो । दुर्घटनामा सफारी चालक हिलिहाङ–१ का अन्दाजी ३५ वर्षीय हेमराज योगीको मृत्यु भएको छ । गम्भीर घाइते भएका उनलाई उपचारका लागि जिल्ला अस्पताल फिदिममा पुर्याउनसाथ चिकित्सकले राति ८ः५० बजेतिर मृत घोषित गरेको जानकारी प्रहरीले दिएको छ ।
दुर्घटनामा परेर सफारीमा सवार हिलिहाङ–१ का अन्दाजी २६ वर्षीय विनोद तामाङ र २० वर्षीय आशिष लिङदेन घाइते भएका छन् । घाइतेमध्ये विनोदको अवस्था गम्भीर छ । दुवै जनाको फिदिममै उपचार भरहेको प्रहरीले जनाएको छ । प्रहरीले घटनाको अनुसन्धान अघि बढाएको छ ।

























