
काठमाडौं । मौसम पूर्वानुमान महाशाखाका अनुसार आज (सोमबार) देशभरको मौसम सफा रहने छ ।
पश्चिमी न्यूनचापीय प्रणालीको असरले शुक्रबार र शनिबार मौसम बदली भएर अधिकांश भू–भागमा वर्षा भएको थियो । आइतबारदेखि त्यो प्रणाली हटेपछि मौसममा सुधार भएको महाशाखाले जनाएको छ ।
महाशाखाका अनुसार सोमबार बिहानैदेखि अधिकांश भू–भागहरूमा मौसम सफा छ । दिउँसो कोशी र गण्डकी प्रदेशका उच्च पहाडी र हिमाली भू–भागमा आंशिक बदली हुने र बाँकी भू–भागमा मुख्यतय सफा रहने अनुमान गरिएको छ ।
सुदूरपश्चिम र कर्णाली प्रदेशका उच्च पहाडी र हिमाली भू–भागमा राति आंशिक बदली रहने र बाँकी भू–भागमा मौसम सफा रहने पूर्वानुमान रहेको महाशाखाले जनाएको छ ।

























