
विराटनगर । सत्ता साझेदार दलहरू भूमिसम्बन्धी अध्यादेश रोक्न सहमत भएका छन् । अब भूमिबाहेक पाँच अध्यादेश मात्रै संसदबाट पास गर्ने सरकारको तयारी छ ।
पास गर्ने अध्यादेशहरु २१ गतेको प्रतिनिधिसभा र २२ गतेको राष्ट्रियसभा बैठकबाट पास गर्ने तयारीमा सरकार लागेको छ ।
सरकारले ६ वटा अध्यादेश ल्याएकामा सत्ता गठबन्धनमा रहेका जसपा नेपाल र लोसपाले भूमिसम्बन्धी अध्यादेश फिर्ताको अडान राखेकाले ५ वटा अध्यादेशमात्र संसदबाट पास गर्न लागिएको हो ।
भूमिसम्बन्धी केही नेपाल ऐन संशोधन अध्यादेश गत २ माघमा जारी भएको थियो । त्यस अगाडि गत १४ पुसमा सहकारीसम्बन्धी केही नेपाल ऐनलाई संशोधन गर्ने अध्यादेश जारी भएको थियो । २९ पुसमा थप चारवटा अध्यादेश जारी भएका थिए ।

























