
विराटनगर । मोरङमा लडेर घाइते भएका २ जनाको मृत्यु भएको छ । मृतक सुन्दरहरैँचा र विराटनगरका हुन् ।
सुन्दरहरैँचा नगरपालिका–११ तीनमुडेका अन्दाजी ६० वर्षीय भरत चौधरीको आफ्नै घरमा लडेर मृत्यु भएको छ । प्रहरीका अनुसार घरमा सुतिरहेका उनी उठ्ने क्रममा खाटबाट लडेर बिहीबार राति १०ः३० बजेतिर बेहोस भएका थिए ।
उपचारका लागि केन्द्र पोलिक्लिनिक गछियामा लगिएको थियो । थप उपचारका लागि विराटनगरको नोबेल शिक्षण अस्पताल पुर्याउँदा चिकित्सकले मृत घोषित गरेको मोरङ प्रहरीका प्रवक्ता डीएसपी वेदप्रकाश जोशीले जानकारी दिए ।
त्यस्तै, कटहरी गाउँपालिका–४ स्थित सप्तकोशी सिमेन्ट फ्याक्ट्रीमा कार्यरत ५० वर्षीय चौठी कामतको मृत्यु भएको छ । विराटनगर महानगरपालिका–६ घर भएका उनी काम गरिरहेका बेला फागुन २२ गते साँझ लडेर गम्भीर घाइते भएका थिए ।
उनलाई उपचारका लागि विराट नर्सिङ होम एवं विराटनगर अस्पतालमा भर्ना गरिएको थियो । उपचारकै क्रममा बिहीबार राति ९ः४५ बजेतिर मृत्यु भएको डीएसपी जोशीले बताए । उनका अनुसार दुवै घटनानको अनुसन्धान भइरहेको छ ।

























