
काठमाडौं । मुलुकका विभिन्न स्थानमा आज (सोमबार) वर्षा र हावाहुरीको सम्भावना रहेको मौसम पूर्वानुमान महाशाखाले जनाएको छ ।
महाशाखाका अनुसार हाल देशमा पश्चिमी न्यूनचापीय प्रणालीको साथै स्थानीय वायुको आंशिक प्रभाव कायमै रहेको छ । देशका पहाडी भू–भागमा बिहान आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहेको छ।
सुदूरपश्चिम, कर्णाली र गण्डकी प्रदेशका केही स्थानमा आइतबार साँझ मेघगर्जन र चट्याङसहित हल्का वर्षा भएको महाशाखाले जनाएको छ । सोमबार पहाडी भू–भागमा आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहने पूर्वानुमान गरिएको छ ।
सुदूरपश्चिम र कर्णाली प्रदेशका पहाडी भू–भागका केही स्थान तथा बाँकी पहाडी भू–भागका १–२ स्थानमा मेघगर्जन र चट्याङसहित हल्का वर्षाको सम्भावना रहेको छ। उच्च पहाडी तथा हिमाली भू–भागका केही स्थान तथा बाँकी उच्च पहाडी तथा हिमाली भू–भागका १–२ स्थानमा हल्का हिमपातको सम्भावना रहेको महाशाखाले उल्लेख गरेको छ।
कोशी र मधेश प्रदेशका केही स्थानमा हावाहुरीको समेत सम्भावना रहेकोले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने सम्भावना रहेको छ ।

























