
काठमाडौं । पर्साको सखुवा प्रसौनी गाउँपालिका–४ को वडा कार्यालय मंगलबार राति तोडफोड भएको छ ।
रातिको समयमा वडा कार्यालय आएका ५ / ६ जनाको समूहले कार्यालयभित्र रहेका सामान तोडफोड गर्नुका साथै कार्यालयको कागजात चोरी गरी लगेको गाउँपालिकाले जनाएको छ ।
सो पालिकाका अध्यक्ष जसवन्त यादवले ५ / ६ जनाको समूहले कार्यालयभित्र रहेको सामान तोडफोड गर्दै अफिसियल कागजात चोरी गरेर लगेको देखिन्छ ।
कार्यालय तोडफोड गर्दै कागजात चोरी गर्नेका विरुद्ध किटानी जाहेरी दिने अध्यक्ष यादवले बताए ।
एक जना भारतीय नागरिकलाई नागरिकता सिफारिस नगरिदिएको झोकमा ती समूहले वडा कार्यालयमा तोडफोड गरेको हुन सक्ने आशंका रहेको अध्यक्ष यादवले जानकारी दिए ।
उनले भने, ‘६ महिनादेखि वडाध्यक्ष ज्यूलाई नागरिकताको सिफारिस दिनका लागि ठुलो दबाब दिँदै आएको सुनेको थिएँ । सायद त्यही समूहले रिसले तोडफोड गरेका हुनुपर्छ ।’
४ नम्बर वडाका वडाध्यक्ष आरिफ अन्सारीले १२ वटा कुर्सी, ३ वटा दराज तोडफोड गर्नुका साथै लेटरप्याड, छाप र ल्यापटप चोरी गरेर लगेको बताए । घटनाको प्रहरी अनुसन्धान थालेको अन्सारीले बताए ।























