विद्युत तारको लापर्बाही : जनसुरक्षाको उपेक्षा

Share this
704shares
मुलुकी खबर
मुलुकी खबर
clock२०८२ बैशाख ८, सोमबार १७:१९

ताप्लेजुङको पाथीभरा तीर्थयात्रामा जाँदै गरेको बोलेरो जिपले विद्युत प्रवाह भएको तारमा छुँदा आगलागी भएर ४ जनाको असामयिक निधन भयो । २ जना घाइते भए । सोमबार बिहान भएको यो दुःखद् घटनाले विद्युत व्यवस्थापनमा भएको लापर्बाही उजागर गरेको छ ।

यो घटना विद्युत प्राधिकरणको उदासीनताको परिणाम हो । स्थानीयको भनाइ अनुसार यो स्थानमा केही दिनदेखिनै तार भुइँ नजिकसम्म झरेको थियो । जोखिम देखिएकै थियो । तर, समयमा विद्युत प्राधिकरणले चासो राखेन । व्यवस्थापन गरेन । जसको परिणाम सोमबार देखियो ।

यो विषयमा गम्भीर अनुसन्धान आवश्यक छ । कमजोरी गर्नेलाई कारबाही गरेर आगामी दिनमा यस्ता दुःखद् घटना हुन नदिन सचेत गराउनुपर्छ । सडकमा लत्रिएका विद्युतका तार, टेलिफोन लाइन र अन्य संरचनाहरूको अनियन्त्रित व्यवस्थापनले निरन्तर जोखिम बढाइरहेको छ ।

ताप्लेजुङको घटना एउटा उदाहरण मात्रै हो । देशभर यो समस्या छ । नेपालका धेरै सहर र गाउँमा विद्युत तारहरू अनियन्त्रित रूपमा फैलिएका छन् । केही ठाउँमा त तारहरू नजिकैबाट छुन सकिने अवस्थामा हुन्छन् । तर, प्राधिकरणले समयमै मर्मतको प्रयास गर्दैन ।

विद्युतीकरण नभएका तारहरू पनि जताततै राखेको पाइन्छ । यसमा अल्झिएर भएका दुर्घटना पनि धेरै छन् । यस्तो गतिविधिले आगलागीको जोखिम पनि बढाएको छ ।

समयमा मर्मत नहुँदा छिटो–छिटो तार टुट्ने, ‘शार्ट सर्किट’ हुने र बिजुलीको झट्का लाग्ने घटनाहरू नेपालमा बढेका छन् । ताप्लेजुङको जिप दुर्घटनाजस्तै घटनाहरूमा मानिसको मृत्यु हुने गरेको छ । धेरै ठाउँमा तारहरू झुण्डिएर सडकसम्म आइपुग्दा पनि धेरै दिन त्यतिकै छाड्ने गरिएको छ । यो सबैले देखिरहेको कुरा हो ।

जसले गाडी चलाउँदा दुर्घटनाको जोखिम बढाउँछ । अझै प्राकृतिक प्रकोपको समयमा अतिरिक्त जोखिम पनि यसले निम्त्याउँछ । भूकम्प, आँधीबेरी वा बाढीले तार टुट्ने र आगलागी हुने सम्भावना बढ्छ । यो समयमा स्थानीय नागरिक त सचेत हुनुपर्छ नै । सम्बन्धित निकाय अझै चनाखो रहनुपर्छ ।

अव्यवस्थित तारले सहरको सौन्दर्यता पनि घटाएको छ । जसले पर्यटकको आकर्षण कम हुन्छ । बजार क्षेत्रमा धेरै तारले गर्दा नयाँ भवन निर्माण, सडक विस्तार र अन्य विकास कार्यमा बाधा पुग्छ । उच्च भोल्टेज भएको तारमा झुन्डिएर धेरै चरा मर्छन् । यसले वातावरणमा पनि असर पार्छ ।

पुराना तार, इन्सुलेटर र केबलहरूले वातावरणमा उच्च असर पारेका छन् । यति मात्रै होइन, अव्यवस्थित तारले बिजुलीको ह्रास बढाउँछ । जसले गर्दा लोडसेडिङ बढ्न सक्छ । यी सबै कारणले गर्दा तार मर्मत र व्यवस्थापनमा समयमै चासो राख्नुपर्छ ।

विद्युत प्राधिकरण, स्थानीय सरकार र सम्बन्धित निकायहरू यसका लागि प्रत्यक्ष रूपमा जिम्मेवार छन् । तारहरू सुरक्षित ढंगले राख्न, नियमित रूपमा निरीक्षण गर्न र जनतालाई विद्युत सुरक्षाको जानकारी दिनु उनीहरूको कर्तव्य हो । तर, अहिलेसम्म पनि सडकमा लड्किएका तारहरू व्यवस्थित गर्ने, भूमिगत लाइन बिछ्याउने वा सुरक्षा उपाय बढाउने काम सुविधा सम्पन्न सहरमा पनि हुन सकेको छैन । यसमा स्थानीय सरकारले बढी चासो राख्नुपर्छ । काम गर्नुपर्छ ।

ताप्लेजुङको घटना केवल १ दुर्घटना होइन, यो सरकार र सम्बन्धित निकायको उदासीनताको प्रतिबिम्ब हो । जनसुरक्षाको मुद्दालाई गम्भीरतापूर्वक लिँदै विद्युत व्यवस्थापनमा सुधार गर्न निजी र सार्वजनिक क्षेत्रले समन्वय गर्नुपर्छ । यस्ता घटनाहरू दोहोरिनबाट रोक्न कडा नीतिगत र व्यावहारिक कदम चाहिन्छ । यसमा सम्बन्धित निकायको चासो पुगोस् ।

तपाइको प्रतिक्रिया
राष्ट्रिय आविष्कार केन्द्रबाट कम्प्युटर चोरी, सीसीटीभीमा कैद भयो घटना
पाँच स्थानीय तह भूमिसम्बन्धी समस्यामुक्त घोषणा
रुसमा सैन्य कार्गो विमान दुर्घटना, चालक दलसहित १९ जनाको मृत्यु
एनपिएलमा अनलाइन सट्टेबाजी गरेको आरोपमा भारतीय नागरिक पक्राउ  
विराटनगरलाई लजिस्टिक हब बनाउन कार्गो रेल सञ्चालनमा जोड
मोरङ र उदयपुरमा दुर्घटना : तीन जना घाइते, दुईको अवस्था गम्भीर
स्थानीय चुनावको तयारीमा एमाले, बुधबारदेखि राष्ट्रिय भेला
विराटनगरमा कराँते छनोटका क्रममा खेलाडी घाइते
डिकवेलाको अविजित अर्धशतकमा लुम्बिनी लायन्स फाइनलमा
कोशी र गण्डकीमा वर्षा तथा हिमपातको सम्भावना
© 2024 Muluki Khabar. All Rights Reserved. Design & Develop By: Indesign Media Pvt. Ltd.