
विराटनगर । विराटनगरको जतुवामा १८ वर्षदेखि सञ्चालनमा आउन नसकेको जतुवा खानेपानी आयोजनाको संरचना र स्वामित्व खानेपानी संस्थान विराटनगर शाखा मातहत आएको छ ।
देवकोटा चोकस्थित संस्थानका प्रमुख इन्जिनियर सन्तोष रौनियारका अनुसार २०६४ सालमा निर्माण गरिएको ४ लाख ५० हजार लिटर खानेपानी क्षमताको सञ्चालनमा नआएको संरचनाको जिम्मा शाखाले पाएको हो ।
२०६४ सालमा खानेपानी तथा ढल ब्यवस्थापन विभागले ४ करोड ९२ लाख रुपैयाँ बराबरको लगानीमा निर्माण गरी उक्त संरचना सञ्चालनका लागि स्थानीय बृहत खानेपानी तथा सरसफाइ आयोजना अन्तर्गत स्थानीय उपभोक्ता समितिलाई हस्तान्तरण गरेको थियो ।
केही समय सञ्चालनमा आए पनि त्यसले निरन्तरता पाउन नसकेपछि संरचना पूर्णरुपमा ठप्प रहेको संस्थानका प्रमुख इन्जिनियर रौनियारले जानकारी दिए । उनले भने, ‘विराटनगरमा खानेपानी समस्या हलका लागि उपाय खोजिरहेका छौं । जतुवामा निर्माण भएर सञ्चालनमा नआएको भौतिक संरचना प्रदेश सरकार खानेपानी सिँचाइ तथा ऊर्जा मन्त्रालयमातहत जिम्मा लिएका हौं ।’
उक्त संरचना बैशाख ५ गतेको मन्त्रीस्तरीय बैठकको निर्णयबाट खानेपानी संस्थान विराटनगर शाखाले सञ्चालनको लागि जिम्मा पाएको हो । हाल उक्त संरचनामा मर्मत सम्भारको आवश्यक्ता रहेको प्रमुख इन्जिनियर रौनियारको भनाई छ ।
संरचना मर्मतपछि आगामी साउनबाट उक्त योजना सञ्चालनमा आउने रौनियारले बताए । ‘ओभर हेड ट्याङकी साढे ४ लाख लिटर क्षमताको छ । ट्याङकी र पाइप पनि मर्मत गर्नुपर्ने अवस्थामा छ ।’
करिब साढे ८ कट्ठा क्षेत्रफलमा फैलिएको संरचनाबाट सर्वसाधारणको घरसम्म पाइप बिच्छाउनुपर्ने अवस्था रहेको उनले बताए ।
उक्त संरचनाबाट पानी वितरण गर्न सक्दा आगामी दिनमा विराटनगर महानगरको ८, ९, १०, १३, १४, १५, १६ लगायतका वडामा खानेपानीको पहुँच हुने उनको भनाई छ ।
संस्थानको विराटनगर महानगरपालिकाभित्र करिब १३ हजार सेवाग्रही रहेको बताउँदै उनले भने, ‘अहिले हामी दैनिक ९० लाख लिटर पानी उत्पादन गरिरहेका छौं । यो मात्रा महानगरवासीका लागि कम हो । तर यहाँ कम्तीमा १ करोड ३० लाख लिटर पानी दैनिक खपतको माग देखिन्छ । त्यसैले पनि करिब ४० लाख लिटर पानी महानगरवासीका लागि कम देखिएको छ ।’
देवकोटा चोकस्थित शाखामा ओभरहेड ट्याङक रहेको बताउँदै उनले महानगरका विभिन्न १२ स्थानमा पम्प राखिएको जानकारी दिए । जामुनगाछी क्षेत्रमा रहेको ओभरहेड ट्याङकी सहितको संरचना माघबाट सञ्चालनमा आएको जनाउँदै संस्थानले पिचरास्थित ओभरहेडसहितको खानेपानी उत्पादन संरचना चालु अवस्थामा रहेको जनाएको छ ।

























