
विराटनगर । गणतन्त्र दिवसकाे अवसरमा कोशी प्रदेश सरकारले अन्तरक्रिया पछि कन्सर्ट आयोजना गर्ने भएको छ । मुख्यमन्त्री हिकमतकुमार कार्कीको नेतृत्वमा रहेको मूल समारोह समितिले बिहीबार कन्सर्ट आयोजना गर्ने भएको हो ।
गणतन्त्र दिवसकै अवसरमा बुधबार बिहान राजनीतिक पार्टीका नेताहरूको उपस्थितिमा अन्तरक्रिया कार्यक्रम गरिनेछ ।
बिहीबार दिउँसो विराटनगरस्थित महेन्द्र चोकमा ‘राष्ट्रिय भावनाले ओतप्रोत गीत–संगीतयुक्त कन्सर्ट’ आयोजना गर्ने भएको हो ।बिहीबार दिउँसो ३ बजे विराटनगरको महेन्द्र चोकमा सरकारले आयोजना गर्ने कन्सर्टमा गायिका रचना रिमाल, अञ्जु गौतम, गंगा गौतम, सृष्टि हिङ्माङ, सुमित खड्कालगायतले प्रस्तुति दिनेछन् ।
बुधबार ‘संघीय लोकतान्त्रिक गणतन्त्रका उपलब्धि, अवसर, सम्भावना र चुनौती’का विषयमा अन्तरक्रिया हुनेछ ।
अन्तरक्रियामा एमाले नेता प्रदीप ज्ञवालीले कार्यपत्र प्रस्तुत गर्नेछन् । वक्ताका रुपमा कांग्रेसका नेता डा. मिनेन्द्र रिजाल र माओवादी नेता हरिबोल गजुरेल सहभागी हुनेछन् ।

























