इजरायली आक्रमणमा ६९ जना प्यालेस्टिनी नागरिकको मृत्यु

एजेन्सी । गाजामा इजरायली सेनाले आक्रमण गर्दा कम्तीमा ६९ जना प्यालेस्टिनी नागरिकको मृत्यु भएको छ ।

हमासको नागरिक सुरक्षा एजेन्सीले दिएको जानकारीअनुसार विस्थापित परिवारको आश्रयस्थल नजिकै बिहीबार हवाई आक्रमण हुँदा १५ जनाको मृत्यु भयो । जसमा धेरैजसो महिला र बालबालिका थिए ।

Advertisement

राहत वितरण केन्द्रतर्फ जाँदै गरेका मानिसहरू पनि इजरायली आक्रमणको सिकार बनेका छन् । गाजाको नागरिक सुरक्षा विभागले यस्ता घटनामा परेर ३८ जनाको मृत्यु भएको जनाएको छ ।

गाजा सहरलगायत विभिन्न क्षेत्रमा उद्धारमा खटिएका स्थानीय स्वयंसेवक र चिकित्सकहरूले आक्रमणमा घाइते भएकाहरूलाई सामान्य स्वास्थ्य सुविधा नभएको अवस्थामा उपचार गर्ने प्रयास गरिरहेका छन्। भीडभाड भएको सहरी क्षेत्रमा अकस्मात आक्रमण भएपछि धुवाँ, आगो र मानव चिच्याहटले अवस्था भयावह बनाएको छ।

इजरायली सेनाले आक्रमणको निशाना हमासका सैन्य संरचनाहरू रहेको बताएको छ। इजरायली डिफेन्स फोर्स (आईडीएफ) ले विज्ञप्ति जारी गर्दै आफ्नो वायु सेनाले गाजामा विगत २४ घण्टामा करिब १ सय ५० स्थानमा आक्रमण गरेको दाबी गरेको छ। ती स्थानहरूमा हमासका सदस्यहरू सक्रिय रहेको र उनीहरूले नागरिक क्षेत्रभित्रै सैन्य संरचना बनाएको आरोप लगाइएको छ।

इजरायली पक्षले नागरिक मृत्युका समाचारलाई अतिरञ्जना गरिएको भन्दै खण्डन गरेको छ। सेनाले व्यापक हताहतीको विवरणलाई ‘झुटा र भ्रामक’ भन्दै आफ्नो लक्ष्य केवल आतंकवादी संरचना भएको दाबी गरेको हो।

तर, हमासद्वारा सञ्चालित गाजाको स्वास्थ्य मन्त्रालयले भने इजरायली सेनाको आक्रमणमा एकैदिन १ सय १८ जनाको मृत्यु भएको दाबी गरेको छ। मन्त्रालयका अनुसार मृत्यु हुनेमध्ये धेरै बालबालिका, महिला र जेष्ठ नागरिक छन्। घाइतेहरूको संख्या सयौं छ । अधिकांशले उपचार पनि पाएका छैनन् ।

गाजाको अवस्था यति भयावह बन्दै गइरहेको बेलामा अन्तर्राष्ट्रिय स्तरमा युद्धविरामका लागि कूटनीतिक प्रयास तीव्र बनाइँदैछ। अमेरिकी राष्ट्रपति डोनाल्ड ट्रम्पले मंगलबार इजरायलले ६० दिने युद्धविरामको प्रस्तावमा आवश्यक सर्तहरूमाथि सहमति दिएको घोषणा गरेका थिए।

तर, सो प्रस्ताव कार्यान्वयनमा अवरोधहरू अझै विद्यमान छन्। हमासले प्रस्ताव अध्ययन भइरहेको बताउँदै इजरायली सेना गाजाबाट पूर्णरूपमा नहटे युद्धविराम सम्भव नहुने अडान लिएको छ।

हाल गाजाका लाखौं नागरिक भोक, रोग, र विस्थापनको पीडामा छन्। अन्तर्राष्ट्रिय राहत संस्था र संयुक्त राष्ट्रसंघले बारम्बार मानवीय सहायता प्रवेश गर्न दिनुपर्ने माग गर्दै आएका छन् ।

तर, इजरायली नाकाबन्दीका कारण त्यस्तो सहायता सहज रूपमा भित्रिन सकेको छैन। अस्पतालहरूमा अत्यावश्यक औषधिको अभाव छ भने शुद्ध पानी र खाना नपाएर बालबालिकाहरू कुपोषणको शिकार भइरहेका छन्।

यसबीच हमास र इजरायलबीच पटक–पटक वार्ता भए पनि कुनै ठोस समझदारी हुन सकेको छैन। इजरायली पक्षले बन्धकहरू नछोडिएसम्म स्थायी युद्धविराम नहुने बताउँदै आएको छ भने हमासले इजरायली फौजको पूर्ण फिर्ता, नाकाबन्दी अन्त्य र गाजाको पुनःनिर्माणका लागि स्वतन्त्रता सुनिश्चित नभएसम्म युद्ध रोक्न नसकिने अडान राखेको छ।

बिहीबारको घटनाले यस युद्धको मानवीय पक्षलाई अझ भयावह बनाएको छ। बालबालिकासहितको ठूलो संख्यामा नागरिकको मृत्यु, घाइतेको उपचार नपाएर मृत्यु र राहतको खोजीमा मारिने अवस्थाले गाजाको संकट झनै गहिरिएको छ। अहिले पनि गाजामा आकाशभर युद्धक विमानहरू घुमिरहेका छन् ।