आयो बिष्णु माझीको तीज गीत ‘म त नराउरी…’ (भिडिओसहित)

विराटनगर । लोकगायिका बिष्णु माझीले आफ्नो नयाँ तीज कोशेली ‘म त नराउरी’ (पुतलीको भट्टी-२१) सार्वजनिक गरेकी छन् ।

गीत सार्वजनिक भएसँगै यसले युट्युबमा मात्र नभई सम्पूर्ण नेपाली संगीतप्रेमीमाझ तरंग ल्याएको छ ।

सधैँझैँ यसपटक पनि माझीले आफ्नो मौलिक स्वर र मार्मिक शब्दमार्फत लाखौं दर्शक–श्रोताको मन जितेकी छन् ।

‘म त नराउरी’ ले चेलीको वेदना र संघर्षको कथा बाेकेकाे छ ।

गीतको भिडियोमा एक चेलीले बिदाइको क्षणमा आँसु लुकाउँदै ‘म त रुन्नँ’ भने पनि उनको हरेक पल संघर्ष र पीडामा बितेको मार्मिक कथा देखाइएको छ।

गर्भवती अवस्थामा घाँस-दाउराको भारी बोक्नुपर्ने बाध्यतादेखि परिवारभित्रको अवहेलनासम्मका दृश्यले धेरैको मन छोएको छ ।

भिडियोमा एकातिर भव्य नृत्य र रंगिन परिवेश छ भने अर्कोतिर एक नारीको यथार्थ जीवनको संघर्षलाई उतारिएको छ, जसले गीतलाई थप भावनात्मक बनाएको छ ।