
काठमाडौं । सत्तारुढ नेपाली कांग्रेसले लिपुलेकबारे भारत र चीनबीच भएको भनिएको सहमति आपत्तिजनक रहेको स्पष्ट पारेको छ । कांग्रेसले उक्त सहमतिप्रति असहमतिसमेत जनाएको छ ।
कांग्रेसका महामन्त्री गगनकुमार थापाले प्रतिनिधिसभाको बिहीबारको बैठकमा बोल्दै २ छिमेकी देशबीचको सहमति अस्वीकार्य रहेको बताए । ‘सरकारले यसबारे सबैलाई समेटेर कदम अघि बढाओस् । हामी आग्रह पनि गर्न चाहन्छौँ । हाम्रै पार्टीका अर्का महामन्त्री विश्वप्रकाश शर्माले ६ बुँदे ध्यानाकर्षण गराउनुभएको छ । त्यसतर्फ सरकारको ध्यान जाओस्,’ थापाले भने ।
यो विषयमा नेपालका सबै राजनीतिक दल एक ठाउँमा उभिनुपर्ने अवस्था रहेको उनको भनाइ छ । मतभेद भुलेर सबै राजनीतिक दलहरूले एकढिक्का भएर नेपाली भूमिका अरुको आँखा पर्न दिने छैन भन्ने सन्देश दिनुपर्ने थापाले बताए ।
























