वीरगन्जमा फैलियो हैजाको प्रकोप

विराटनगर । वीरगन्जमा हैजाको प्रकोप तीव्र रूपमा फैलिएको छ । हैजा महामारीको रूपमा फैलिएको हो ।

नारायणी अस्पताल र विभिन्न निजी अस्पतालमा झाडापखालाका बिरामी बढिरहेका बेला शनिबार मात्रै थप ७ जनामा हैजा पुष्टि भएको छ । यससँगै वीरगन्ज क्षेत्रमा हैजाबाट संक्रमित हुनेको संख्या बढ्दै गएको हो ।

नारायणी अस्पतालका सूचना अधिकारी डा. उदयनारायण सिंहका अनुसार शुक्रबार झाडापखालासहित उपचाररत १५ जनामध्ये ८ जनालाई परीक्षण गर्दा ५ जनामा हैजा पुष्टि भएको छ । संक्रमित वीरगन्ज महानगरपालिका–१२ मुर्ली टोलका बासिन्दा हुन् ।

यस्तै, वीरगन्जकै अर्को अस्पतालमा शनिबार थप २ जनामा हैजा पुष्टि भएको महानगरको स्वास्थ्य शाखा प्रमुख राजु साहले जानकारी दिए । ती बिरामी वडा नम्बर ११ र १३ का हुन् । यसअघि शुक्रबार तराई हस्पिटलमा ३० जनाको परीक्षण गर्दा ३ जनामा हैजा पुष्टि भएको थियो ।

वीरगन्ज–१४, बहुअरीस्थित वीरगन्ज हेल्थ केयर अस्पतालमा झाडापखालाका १३ जना बिरामी भर्ना भएका छन् । ती सबैको नमुना परीक्षणका लागि स्वास्थ्य कार्यालय पर्सा पठाइएको अस्पतालका अध्यक्ष डा. अबुल हैस अन्सारीले बताए । उनका अनुसार तीमध्ये ३ जनाको अवस्था गम्भीर छ।

संक्रमण बढ्दै जाँदा मृत्युसमेत हुन थालेको छ । शुक्रबार साँझ वीरगन्ज हेल्थ केयर अस्पतालमा ल्याइएकी पोखरिया नगरपालिका–९ की १९ वर्षीया युवती र नारायणी अस्पतालमा ल्याइएका वीरगन्ज–१६ का ३५ वर्षीय पुरुषको मृत्यु भएको छ । तर, उनीहरूको मृत्यु हैजाकै कारण भएको हो वा होइन भनेर यकिन छैन ।

नमुना संकलन गरेर परीक्षणका लागि पठाइएको छ । हैजा फैलिएको वीरगन्ज–१२, मुर्ली टोलमा शुक्रबार रातिदेखि नै रोकथाम तथा नियन्त्रणका लागि स्वास्थ्यकर्मीको टोली खटाइएको छ ।

मेयर राजेशमान सिंहको निर्देशनमा खटिएको टोलीले घर–घर पुगेर अवस्थाको जानकारी लिएको छ । सतर्कता अपनाउन आग्रह गरेको छ । टोलीले त्यहाँ प्रयोग भइरहेको पिउने पानीको नमुना संकलन गरेर काठमाडौंको टेकुमा परीक्षणका लागि पठाएको जनस्वास्थ्य अधिकृत जयमोद ठाकुरले जानकारी दिए ।

उनका अनुसार, पर्सा जिल्लामा पछिल्लो १० वर्षयता पहिलोपटक हैजाको प्रकोप देखिएको हो । दूषित खाना वा पानीमार्फत ‘भिब्रियो कोलेरी’ नामक जीवाणु शरीरमा प्रवेश गर्दा हैजा लाग्ने गर्दछ । यसको मुख्य लक्षण निरन्तर झाडापखाला लाग्ने, वान्ता हुने, पेट दुख्ने, आँखा गाडिने, शरीरमा पानीको कमी भएर मांसपेसी दुख्ने र ज्वरो आउने हो ।

अहिले वीरगन्जमा हैजासँगै झाडापखालाका बिरामीको संख्यामा अस्वाभाविक वृद्धि भएकाले स्वास्थ्य निकाय सतर्क बनेको छ । परीक्षण नतिजा र नियन्त्रण अभियान कति प्रभावकारी हुन्छ भन्ने कुराले आगामी स्थिति निर्धारण गर्ने स्वास्थ्यकर्मीहरु बताउँछन् ।