
काठमाडौं । कपिलवस्तुको तौलिहवामा बिहीबार साँझमा बम विस्फोट भएको छ । विस्फोटबाट मानवीय क्षति भएको छैन ।
तौलिहवा –४ नम्बर सडक खण्डअन्तर्गत कपिलवस्तु नगरपालिका –१० पचेहरा हाट बजार नजिकै बिहीबार साँझ ६ बजे १० मिनेटतिर ठुलो आवाज आएको थियो ।
मुख्य सडकको बीच भागमा बम विस्फोट हुँदा गहिरो खाल्डो हुँदा सडक ध्वस्त भएको प्रहरीले जनाएको छ ।
प्रहरीका अनुसार सडकभित्र दबेर रहेको विस्फोटजन्य पदार्थ आफै विस्फोट हुँदा सडकमा क्षति पुगेको छ । विस्फोट भएको समयमा सडक सुनसान भएका कारण मानवीय क्षति हुन पाएन ।
विस्फोट भएको स्थानको वरपर बमका छर्रा भेटिएको बताइएको छ । बम विस्फोट भएको स्थान नजिकै सोमबार हाटबजार लाग्ने गरेको थियो । घटनाको अनुसन्धान सुरु भइसकेको प्रहरीले जनाएको छ ।























