राष्ट्रपति रामचन्द्र पौडेल अस्वस्थ, मनमोहन कार्डियोथरासिक केन्द्रमा भर्ना

काठमाडौं । राष्ट्रपति रामचन्द्र पौडेल अस्वस्थ भएपछि महाराजगञ्जस्थित मनमोहन कार्डियोथरासिक भास्कुलर एन्ड ट्रान्सप्लान्ट सेन्टरमा भर्ना गरिएको छ ।

शनिबार बिहान जेनजी प्रतिनिधिहरूसँग छलफलको कार्यक्रम तय भएको थियो । तर, स्वास्थ्यमा समस्या देखिएपछि उनले उक्त बैठक २ दिनका लागि स्थगित गरेका छन् । छलफल सोमबारलाई सारिएको छ ।

राष्ट्रपतिलाई अस्पताल लगिएको केही समयपछि चिकित्सक टोलीले प्रारम्भिक स्वास्थ्य परीक्षण सुरु गरेको अस्पताल स्रोतले जनाएको छ । हाल उनको अवस्था सामान्य रहेको र थप परीक्षण भइरहेको अस्पतालले जनाएको छ ।

राष्ट्रपति पौडेलको स्वास्थ्यबारे चिकित्सक टोलीले आवश्यक परीक्षणपछि विस्तृत जानकारी सार्वजनिक गर्ने तयारी गरेको बताइएको छ । उनले केही दिनदेखि अस्वस्थ महसुस गरिरहेका थिए ।

शीतल निवासका अनुसार चिकित्सकहरूको सल्लाहअनुसार राष्ट्रपतिलाई अस्पताल पुर्याएको हो । हाल उनको उपचार विशेषज्ञ डाक्टरहरूको निगरानीमा भइरहेको छ ।