ओमानसँग खेल्दै नेपाल, जिते सिधै विश्वकपमा

काठमाडौं । आईसीसी टी–२० विश्वकप एसिया–प्यासिफिक क्षेत्रीय फाइनलको तेस्रो खेलमा नेपालले  घरेलु टिम ओमानसँग खेल्दैछ ।  नेपाल आज जितसहित तेस्रोपटक विश्वमञ्चमा उक्लिने लक्ष्यमा हुनेछ ।

सुपर–६ मा लगातार दोस्रो जित निकालेको नेपाल ६ अंकसहित विश्वकपनजिक छ । नेपालले आजको खेलमा जित निकाले आगामी वर्ष भारत र श्रीलंकामा हुने विश्वकपमा स्थान सुनिश्चित गर्नेछ ।

Advertisement

तालिकाको दोस्रो स्थानमा नेपाल छ । आजको खेलमा जित निकाले समग्रमा नेपाली टिमले तेस्रोपटक टी–२० विश्वकपको ढोका खोल्नेछ ।

यी दुई टिमबीचको खेल नेपाली समयअनुसार राति ८:४५ बजेदेखि सुरु हुनेछ ।

नेपालविरुद्ध मैदान उत्रिँदा ओमानको लक्ष्य पनि यही हुनेछ । ६ अंकसहित नेपाललाई नेट रनरेटमा पछि पार्दै शीर्ष स्थानमा आसिन ओमानले पनि यो खेलमा जित निकाल्न सके विश्वकप यात्रा तय गर्नेछ ।

नेपालले यसअघि सुपर–६ को पहिलो खेलमा युनाइटेड अरब इमिरेट्स (यूएई) विरुद्ध एक रनको र कतारविरुद्ध पाँच रनको जित निकालेको थियो । ओमानपछि नेपालले सुपर–६ को अन्तिम खेलमा समाओविरुद्ध प्रतिस्पर्धा गर्नेछ ।

 दुईपटक विश्वकपमा प्रतिस्पर्धा
नेपाली क्रिकेट टिमले हालसम्म दुईपटक मात्र ट्वान्टी–२० विश्वकपमा प्रतिस्पर्धा गरेको छ ।

नेपालले पहिलोपटक सन् २०१४ मा बंगलादेशमा आयोजित विश्वकपमा प्रतिस्पर्धा गरेको थियो ।

त्यसबेला नेपाली टिम नेपाल क्रिकेट संघ (क्यान)का हालका सचिव पारस खड्काको कप्तानीमा प्रतिस्पर्धामा उत्रिएको थियो ।

नेपालले गत वर्ष अमेरिका र वेस्ट इन्डिजमा आयोजित टी ट्वान्टी विश्वकपमा प्रतिस्पर्धा गरेको थियो ।