कांग्रेस केन्द्रीयसमिति बैठक : महाधिवेशनको मिति विवाद टुङ्ग्याउने अन्तिम प्रयास

Share this
677shares
मुलुकी खबर
मुलुकी खबर
clock२०८२ मंसिर ६, शनिबार १४:०४

काठमाडौँ । लामो समयदेखि स्थगित हुँदै आएको नेपाली कांग्रेस केन्द्रीय कार्यसमिति बैठक आज पार्टीको केन्द्रीय कार्यालय, बीपी स्मृति भवनमा बसिरहेको छ । पार्टीका मुख्यसचिव कृष्णप्रसाद पौडेलका अनुसार, गत असोज २८ गतेबाट सुरु भएको बैठकमा पदाधिकारी र सदस्यहरूले धारणा राखिसकेपछि १५औँ महाधिवेशन कहिले गर्ने भन्ने विवाद मिलाउन पटक-पटक बैठक सारिएको थियो ।

पार्टीभित्र १५औँ महाधिवेशन प्रतिनिधिसभा निर्वाचनअगाडि गर्ने कि पछाडि भन्ने विवाद चर्किएको छ । यो गतिरोध अन्त्य गर्न कार्यवाहक सभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा लगायतका शीर्ष नेताहरू मध्यमार्गी बाटोबाट सहमति जुटाउने गहन छलफलमा छन् ।

प्रचार विभाग प्रमुख मीन विश्वकर्माले महाधिवेशन विवाद समाधानका लागि नेताहरू अहिले अनौपचारिक छलफलमा रहेको र आज दिउँसोसम्ममा केही न केही मध्यमार्गी प्रस्ताव ल्याउनुपर्ने ठूलो दबाब रहेको बताएका छन्।

विवादका दुई प्रस्ताव: पुस कि वैशाख ? बैठकमा महाधिवेशनको मितिका सम्बन्धमा दुई फरक प्रस्तावहरू पेस भएका छन्:

महामन्त्री गगन थापाको प्रस्ताव: पुस १६ देखि १९ गतेसम्म महाधिवेशन गर्नुपर्ने। (इतर समूहको समर्थन)

सहमहामन्त्री महेन्द्र यादवको प्रस्ताव: वैशाख २७ देखि ३० गतेसम्म महाधिवेशन गर्ने। (संस्थापन समूहको समर्थन)

यी दुई प्रस्तावले विवाद चर्काएपछि अहिले डा. शेखर कोइराला र सहमहामन्त्री महालक्ष्मी उपाध्याय लगायतका नेताहरू दुवै प्रस्तावलाई मिलाएर एउटा साझा र मध्यमार्गी प्रस्ताव ल्याउने प्रयासमा जुटिरहेका छन् । आज बस्ने बैठकले महाधिवेशनको मिति निर्धारण गरी विवादको निरूपण गर्ने अपेक्षा गरिएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.