महाधिवेशनमा चार नेताले छाडे केपी शर्मा ओलीको साथ, प्रदीप ज्ञवाली पनि रुष्ट

काठमाडौं । नेकपा एमालेको ११ औं महाधिवेशनका क्रममा चार नेताले अध्यक्ष केपी शर्मा ओलीको साथ छाडेका छन् ।

पदाधिकारीको उम्मेदवार नबनाएपछि निवर्तमान शिक्षा, विज्ञान तथा प्रविधि मन्त्री रहेका रघुजी पन्त, प्रचार विभाग प्रमुख राजेन्द्र गौतम, कृष्णगोपाल श्रेष्ठ र गोकुल बास्कोटाले ओलीको साथ छाडेका हुन् । प्रदीप ज्ञवाली, अग्नी खरेल र राजेन्द्र गाैतम पनि उनीसँग रुष्ट बनेका छन् ।

Advertisement

एमाले नेता प्रदीप ज्ञवाली पनि ओलीसँग रुष्ट बनेका छन् । ओलीले उनलाई उपाध्यक्षको उम्मेदवारको सूचीमा राखेका थिए । ज्ञवालीले महासचिवबाहेक अन्य पदमा आफ्नो इच्छा नरहेको बताएका थिए ।

एमाले नेता पन्तलाई ओलीले केन्द्रीय समितिमा राखेका थिए । पदाधिकारीमा नराखेपछि उनले उपाध्यक्षमा उम्मेदवारी दिएका छन् ।

ओली समूहबाट सचिव लड्न चाहेका प्रचार विभाग प्रमुख गौतमले पनि टिकट पाएनन् । उनले स्वतन्त्र रूपमा उपमहासचिव पदमा उम्मेदवारी दर्ता गरेका छन् ।

अध्यक्ष ओलीका निकट रहेका श्रेष्ठले आफूलाई अपमान र अन्याय गरिएको भन्दै उनी पोखरेल समूहबाट सचिवको उम्मेदवार बनेका छन् । ओलीका निकट सहयोगी नेता गोकुल बास्कोटा पनि पोखरेल समूहबाट सचिवमा उम्मेदवार छन् । लालबाबु पण्डित पनि ओलीसँग रुष्ट छन् ।

अध्यक्षमा ओली र पोखरेलबिच प्रतिस्पर्धा हुनेछ । महासचिवमा ओली पक्षबाट शंकर पोखरेल र पोखरेल पक्षबाट सुरेन्द्र पाण्डे उम्मेदवार छन् ।