जीवन घिमिरे: प्रदेशदेखि केन्द्रसम्मै प्रभावशाली

Share this
718shares
मुलुकी खबर
मुलुकी खबर
clock२०८२ पुस ५, शनिबार १३:०७

विराटनगर । नेकपा (एमाले) को राजनीतिमा कोशी प्रदेशबाट प्रभावशाली पहिचान बनाएका नेता जीवन घिमिरे पार्टीको ११ औँ महाधिवेशनबाट पुनः केन्द्रीय सदस्यमा निर्वाचित भएका छन् । यसपटकको महाधिवेशनमा उनी सचिव पदका बलिया दाबेदार थिए । तर, पार्टीको आन्तरिक समीकरण र संस्थापन पक्षको रोजाइमा नपरेपछि उनले पुनः केन्द्रीय सदस्यमै चित्त बुझाउनु पर्यो । चुनावी मैदानबाट उनी भारी मतका साथ विजयी हुँदै आफ्नो लोकप्रियता पुनः पुष्टि गरेका छन् ।

मन्त्रीका रूपमा सफल ‘इनिङ’

घिमिरेको चर्चा हुँदा २०७४ सालपछिको उनको मन्त्री कार्यकाल अग्रपंक्तिमा आउँछ । कोशी प्रदेशको सामाजिक विकास मन्त्रीका रूपमा उनले शिक्षा, स्वास्थ्य र खेलकुद क्षेत्रमा नवीन सुरुवात गरेका थिए । विशेषगरी कोभिड–१९ को संकट व्यवस्थापनमा उनले देखाएको सक्रियता र ‘कोभिड अस्पताल’ निर्माणको नेतृत्वलाई अहिले पनि सफल उदाहरण मानिन्छ । प्राकृतिक चिकित्साको प्रवर्द्धन र प्रविधिमैत्री शिक्षामा उनले चालेका कदमले उनलाई एक ‘भिजनरी’ मन्त्रीका रूपमा स्थापित गरेको थियो ।

स्ववियुदेखि केन्द्रीय राजनीतिसम्म

घिमिरेको राजनीतिक जग २०३५ सालबाटै बसेको हो । झापाको शिवगञ्जस्थित जनआदर्श माध्यमिक विद्यालयको स्ववियु सभापतिबाट सुरु भएको उनको यात्रा अनेरास्ववियुको जिल्ला, अञ्चल हुँदै केन्द्रीय संगठन विभाग प्रमुखसम्म पुग्यो । विद्यार्थी राजनीतिपछि युवा संघको केन्द्रीय उपाध्यक्ष बनेका उनले एमालेको मोरङ जिल्ला इन्चार्ज, कोशी प्रदेश सचिव र सह–इन्चार्ज जस्ता महत्त्वपूर्ण जिम्मेवारीहरू कुशलतापूर्वक सम्हालिसकेका छन् ।

उतारचढाव र निष्कलंक छवि

लामो राजनीतिक यात्रामा घिमिरेको छवि सधैँ स्वच्छ र निष्कलंक रह्यो । यद्यपि, उनको राजनीतिक जीवनमा केही नाटकीय मोडहरू पनि आए । कुनै समय माधवकुमार नेपाल समूहमा रहेका उनी पार्टी विभाजनका बेला एमालेमै रहने ‘१० बुँदे’ पक्षधर नेता थिए । पार्टीभित्रको गुटगत शक्ति सन्तुलनमा कहिलेकाहीँ उनी कमजोर देखिए पनि आफ्नो अडानमा भने अडिग रहे ।

पछिल्लो समय गत भदौ २४ गते ‘जेनजी’ आन्दोलनका क्रममा उनले पार्टीबाट अचानक राजीनामा दिएका थिए । तर, ‘आफ्नो घर र परिवार जोगाउन’ बाध्यतावश राजीनामा दिएको स्पष्ट पार्दै उनी पुनः सक्रिय राजनीतिमा फर्किए । अहिले एमालेको संस्थापन पक्ष (ओली समूह) सँगको समन्वयमा रहेका घिमिरेलाई पार्टीले पुनः केन्द्रीय नेतृत्वमा ल्याउनुले उनको राजनीतिक अपरिहार्यतालाई पुष्टि गर्छ ।

पदको दाबेदारी जे-जस्तो रहे पनि जीवन घिमिरे एमालेका लागि एक बौद्धिक र अनुभवी खम्बा हुन्। प्रदेशको सफल मन्त्रीदेखि पार्टीको केन्द्रीय सदस्यसम्मको उनको यो निरन्तरताले कोशी प्रदेशको राजनीतिमा उनको प्रभाव आगामी दिनमा अझै बढ्ने संकेत गरेको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.