
विराटनगर । विराटनगरकाे मालपाेत कार्यालय र जिल्ला प्रशासन कार्यालय माेरङका सेवाग्राहीलाई अनावश्यक दुःख दिएको र अवैध रूपमा रकम असुली गरेको आरोपमा प्रहरीले ३० जना बिचौलियालाई पक्राउ गरेको छ । मंगलबार जिल्ला प्रशासन कार्यालय मोरङ र मालपोत कार्यालय विराटनगर परिसरबाट पक्राउ गरेकाे हाे ।
लामो समयदेखि सरकारी कार्यालयहरूमा बिचौलियाको बिगबिगी बढेको जनगुनासो आएपछि जिल्ला प्रहरी कार्यालय मोरङले सादा पोशाकमा टोली परिचालन गरेको थियो ।
प्रहरीका अनुसार पक्राउ परेकामध्ये १० जना जिल्ला प्रशासन कार्यालय र २० जना मालपोत कार्यालय परिसरबाट समातिएका हुन् ।
मोरङका सहायक प्रमुख जिल्ला अधिकारी सरोज कोइरालाका अनुसार कर्मचारीलाई मिलाउनु पर्छ भन्दै सेवाग्राहीसँग रकम मागेको सूचनाका आधारमा विचाैलिया पक्राउ परेका हुन् ।
“जिल्ला प्रशासनमा आउने सेवाग्राहीलाई कर्मचारीसँग काम मिलाइदिने बहानामा पैसा माग्ने गरेकाे गुनासाे थियाे,’ कोइरालाले भने,’ मालपोतमा अनधिकृत रूपमा कार्यालय भित्रै छिरेर ढड्डा हेर्ने तथा परिसरमा टेवल-कुर्सी राखेर सेवाग्राहीलाई सास्ती दिने गरेको भेटिएपछि उनीहरूलाई नियन्त्रणमा लिइएको हो ।”
प्रहरीले लेखापढी व्यवसायीहरूलाई पक्राउ गरेको भन्दै नेपाल लेखापढी कानुन व्यवसायी एसोसिएसन विराटनगर इकाईले विरोध जनाएको छ । आफ्ना व्यवसायीहरूलाई बिना सर्त रिहाई गर्न माग गर्दै एसोसिएसनले केही घण्टा मालपोत कार्यालयमा तालाबन्दी गरेको थियो ।
तालाबन्दीका कारण दिउँसोको समयमा मालपोतका सेवाग्राही मर्कामा परेका थिए । यद्यपि, केही घण्टामा तालाबन्दी खोलिएकाे थियाे ।
जिल्ला प्रहरी कार्यालय मोरङकी प्रवक्ता डिएसपी कोपिला चुँडालले पक्राउ परेका व्यक्तिहरूमाथि अनुसन्धान भइरहेको जानकारी दिइन् । “अपराधिक र अवाञ्छित गतिविधिमा संलग्न रहेको सूचनाका आधारमा हामीले उनीहरूलाई नियन्त्रणमा लिएका हौं,” डिएसपी चुँडालले भनिन्, “अहिले स्कृनिङ (छानबिन) को काम भइरहेको छ। कसुर हेरेर मुद्दा चलाउने वा नचलाउने निर्णय हुन्छ ।”

























