
काठमाडौँ । मधेश प्रदेशका पूर्व राज्यमन्त्री एवं निलम्बित सांसद सरोज कुमार सिंहसहित १६ जनाविरुद्ध दायर भएको भ्रष्टाचार मुद्दाको सुनुवाइका लागि आज मंगलबार पेसी तोकिएको छ। विशेष अदालतका अध्यक्ष सुदर्शनदेव भट्ट तथा न्यायाधीशद्वय उमेश कोइराला र विदुर कोइरालाको इजलासमा यस मुद्दाको सुनुवाइ हुन लागेको हो। अख्तियार दुरुपयोग अनुसन्धान आयोगले सिंहले पदको दुरुपयोग गरी सरकारी रकम हिनामिना गरेको अभियोगमा विशेष अदालतमा मुद्दा दायर गरेको थियो।
अख्तियारले निलम्बित सांसद सिंहविरुद्ध ३८ लाख ५० हजार ३ सय १९ रुपैयाँ बिगो मागदाबी गरेको छ। सिंहले उपभोक्ता समितिको खातामा जम्मा भएको रकम आफ्ना स्वकीय सचिव विनोद कुमार लाल कायस्थमार्फत झिक्न लगाई उक्त रकम आफ्नो र श्रीमतीको नाममा रहेको संयुक्त खातामा जम्मा गरेर व्यक्तिगत प्रयोजनमा खर्च गरेको दाबी आयोगको छ। सोही अभियोगमा सिंह र उनका स्वकीय सचिवसहित अन्य १५ जनालाई प्रतिवादी बनाएर मुद्दा चलाइएको हो।
मुद्दा दायर भएका अन्य प्रतिवादीहरूमा रमेश मडर, अमलेश कुमारी, दिपाराज देवी राजपूत, भिखारी राउत कुर्मी, भूपेन्द्र कुमार झा, मञ्जु देवी पासमान, रामनाथ सहनी, स्वीकृति देवी, रामशरण खत्वे, बिभा देवी खत्वे, शम्भु कुमार मण्डल, योगिन्द्र महतो, सुनयना कुमारी, यमुना प्रसाद महतो र कौशिल्या देवी रहेका छन्।
उपभोक्ता समितिका पदाधिकारी र अन्य सहयोगीहरूको मिलेमतोमा सार्वजनिक सम्पत्ति हिनामिना भएको यस प्रकरणलाई मधेश प्रदेशको राजनीतिमा निकै चासोका साथ हेरिएको छ। आजको सुनुवाइले यस मुद्दाको फैसला वा अर्को प्रक्रियाका बारेमा ठोस दिशा तय गर्ने अपेक्षा गरिएको छ।

























