
धनकुटा। कोशी प्रदेशका मुख्यमन्त्री हिक्मतकुमार कार्कीले राष्ट्रिय झण्डाको दुरुपयोग गरेर भोट माग्ने गतिविधि गैरकानुनी र आपत्तिजनक रहेको बताएका छन् । धनकुटा लेडी जेसिसको सातौँ पद हस्तान्तरण कार्यक्रममा बोल्दै उनले निर्वाचनमा राष्ट्रिय गरिमा झल्काउने सूर्यचन्द्र अंकित झण्डा प्रयोग गर्नु अनुचित रहेको टिप्पणी गरे ।
मुख्यमन्त्री कार्कीले चुनाव प्रचारका क्रममा विभिन्न दलहरूले राष्ट्रिय झण्डाको दुरुपयोग गर्दा राष्ट्रिय एकता र प्रतीकको अवमूल्यन भएको बताए । नेपालीको साझा प्रतीकका रूपमा रहेको झण्डा ओढेर भोट माग्ने र सार्वजनिक तथा निजी सम्पत्तिमा आगजनी गर्ने कार्य कुनै पनि हालतमा क्षम्य नहुने उनको भनाइ छ । यस्ता गतिविधिले लोकतन्त्र र सामाजिक सद्भावमा नकारात्मक असर पार्ने भन्दै यसको नियन्त्रण आवश्यक रहेको उनले उल्लेख गरे ।
सम्बोधनका क्रममा मुख्यमन्त्री कार्कीले ‘जेन–जी’ अभियानका क्रममा मारिएका व्यक्तिहरूलाई सरकारले सहिद घोषणा गरेकोप्रति कडा असन्तुष्टि पोखे । उनले राष्ट्रिय झण्डा ओढेर उपद्रो र चोरी गर्न जाँदा ज्यान गुमाएकाहरूलाई सहिद बनाइनु गलत भएको तर्क गरे । ‘तपाईंको घर चोर्न आउने वा महिलामाथि व्यभिचार गर्नेको प्रतिकार गर्दा मारिनेलाई सहिद घोषणा गरिन्छ भने कस्तो लाग्छ?’ भन्दै उनले प्रश्न गरे ।
भदौ २३ र २४ गते बालबालिका र नवयुवालाई उक्साएर सामाजिक सञ्जालमार्फत विग्रह मच्चाइएको उनले दाबी गरे । अवसरवादी तत्वहरूले बालबालिकालाई आगो लगाउन प्रयोग गरेको र प्रहरीको गोली लागेर उनीहरूको मृत्यु हुनु दुखद भए पनि यसलाई राजनीतिकरण गरिनु नहुने उनको आशय छ । यस्ता प्रवृत्ति अन्त्यका लागि गाउँ-गाउँमा नैतिकवान युवाहरू संगठित हुनुपर्नेमा उनले जोड दिए ।

























