३३ करोड भ्रष्टाचार मुद्दा: सुनिल पौडेलसहित १८ जनाविरुद्धको सुनुवाइ स्थगित

काठमाडौँ। नेपाल टेलिकमका तत्कालीन प्रबन्ध निर्देशक सुनिल पौडेलसहित १८ जना विरुद्धको भ्रष्टाचार मुद्दाको सुनुवाइ स्थगित भएको छ। विशेष अदालतका अध्यक्ष सुदर्शनदेव भट्ट र न्यायाधीश डिल्लीरत्न श्रेष्ठको इजलासमा तोकिएको पेसी प्रतिवादी तर्फका कानुन व्यवसायीको अनुरोधमा स्थगित गरिएको हो।

नेपाल टेलिकमको बिलिङ प्रणाली स्तरोन्नति गर्ने क्रममा मिलेमतो गरी ३३ करोड रुपैयाँ भ्रष्टाचार गरेको अभियोगमा उनीहरूविरुद्ध मुद्दा चलिरहेको छ। चिनियाँ कम्पनी ‘एसियाइन्फो लिंकेज टेक्नोलोजी’ सँग गरिएको सम्झौतामा अस्वाभाविक मूल्य कायम गरी सरकारी कोषमा नोक्सानी पुर्‍याएको अख्तियारको दाबी छ।

यो मुद्दाको चुरो २०६८ सालदेखि सुरु भएको थियो, जहाँ जीएसएम मोबाइल, इन्टरनेट र अन्य दूरसञ्चार सेवाहरूलाई एउटै प्लेटफर्ममा एकीकृत गर्ने लक्ष्य राखिएको थियो। सम्झौता अनुसार वार्षिक मर्मत सम्भार शुल्क ५ प्रतिशत घट्दो दरमा तिर्नुपर्ने व्यवस्थाको उल्लंघन गरी बढी रकम भुक्तानी गरिएको आरोप छ। प्रतिवादी तर्फबाट पेसी स्थगित भएपछि यो बहुचर्चित मुद्दाको फैसला केही समय पछि धकेलिएको छ।