अतिसंवेदनशील मतदान केन्द्रमा कडा सुरक्षा, १ महिना अघिदेखि नै बढाइयो निगरानी

Share this
686shares
मुलुकी खबर
मुलुकी खबर
clock२०८२ माघ १७, शनिबार ०६:३४

काठमाडौं । आगामी निर्वाचनलाई शान्तिपूर्ण, निष्पक्ष र भयरहित रूपमा सम्पन्न गराउने लक्ष्यसहित गृह मन्त्रालयले देशभरका अतिसंवेदनशील मतदान केन्द्रमा १महिनाअघिदेखि नै कडा निगरानी सुरु गरेको छ ।

विगतका अनुभव, सम्भावित सुरक्षा जोखिम र भौगोलिक अवस्थाको सूक्ष्म विश्लेषणका आधारमा कुल १० हजार ९ सय ६७ मतदानस्थलमध्ये ३ हजार ६ सय ८० मतदान केन्द्रलाई अतिसंवेदनशील सूचीमा राखी विशेष सुरक्षा व्यवस्था मिलाइएको हो । गृह मन्त्रालयका अनुसार ती मतदान केन्द्रमा अहिले नै अतिरिक्त सुरक्षा सतर्कता अपनाइएको छ ।

अतिसंवेदनशील सूचीमा परेका अधिकांश मतदान केन्द्र तराईका जिल्लामा रहेका छन् । यसबाहेक सुरक्षा चुनौतीको स्तर मूल्यांकन गर्दै थप ४ हजार ४ सय ४२ मतदान केन्द्रलाई ‘संवेदनशील’ सूचीमा राखिएको छ । मन्त्रालयका एक उच्च अधिकारीका अनुसार केही निर्वाचन क्षेत्र र मतदान केन्द्रमा सुरक्षाको दृष्टिले निगरानी बढाइएको छ ।

सुरक्षा चुनौतीका आधारमा मतदान केन्द्रलाई सामान्य, संवेदनशील र अतिसंवेदनशील गरी ३ तहमा वर्गीकरण गरिएको छ । अतिसंवेदनशील सूचीमा रहेका केन्द्रहरूको वस्तुस्थिति बुझ्न नेपाल प्रहरी र सशस्त्र प्रहरीले स्थलगत अनुगमन र सूचना संकलनलाई तीव्र बनाएका छन् । यी केन्द्रहरू मुख्यतः भौगोलिक विकटता, विगतमा भएका हिंसात्मक घटना र सम्भावित सुरक्षा जोखिमलाई आधार मानेर छनोट गरिएको गृह मन्त्रालयले जनाएको छ ।

काठमाडौं, दोलखा, सिन्धुली, झापा, सर्लाही, रौतहट, बारा, पर्सा, महोत्तरी, धनुषा, रुपन्देही, बाँके, बर्दिया, चितवन, मोरङ, सुनसरी, कास्की लगायतका जिल्लामा सुरक्षा अवस्था कडा पारिएको छ । प्रदेशगत रूपमा हेर्दा मधेश प्रदेशमा सबैभन्दा बढी १ हजार २ सय ४६ अतिसंवेदनशील मतदान केन्द्र रहेका छन् ।

त्यसपछि सुदूरपश्चिम प्रदेशमा ४ सय ८१, लुम्बिनी प्रदेशमा ४ सय ६२, कोशी प्रदेशमा ४ सय ३९, कर्णाली प्रदेशमा ३ सय ५८, गण्डकी प्रदेशमा ३ सय २८ र बागमती प्रदेशमा ४४ मतदान केन्द्र अतिसंवेदनशील सूचीमा छन् । काठमाडौं उपत्यकाभित्र १२ वटा अतिसंवेदनशील मतदानस्थल रहेका छन् ।

गृह मन्त्रालयले सुरक्षा जनशक्ति परिचालनमा पनि स्पष्ट मापदण्ड तय गरेको छ । अतिसंवेदनशील मतदानस्थलमा एउटा केन्द्र भएमा ३ जना नेपाल प्रहरी र १० जना निर्वाचन प्रहरी खटाइनेछ । एउटै स्थलमा थप केन्द्र भएमा प्रतिकेन्द्र २ जना नेपाल प्रहरी र ४ जना निर्वाचन प्रहरी थप गरिने व्यवस्था गरिएको छ ।

संवेदनशील मतदानस्थलमा आधारभूत रूपमा ३ जना नेपाल प्रहरी र ६ जना निर्वाचन प्रहरी खटाइनेछ भने सामान्य स्थलमा २ केन्द्रसम्म ४ जना नेपाल प्रहरी र ९ जना निर्वाचन प्रहरी परिचालन गरिनेछ । आवश्यकताअनुसार सशस्त्र प्रहरी बल र नेपाली सेना पनि परिचालन गरिने गृह मन्त्रालयले जनाएको छ ।

मतदातालाई सुरक्षित रूपमा मतदान केन्द्रसम्म पुग्ने वातावरण बनाउन मन्त्रालयले सुरक्षा निकायसँगै सामाजिक समन्वयको अवधारणा अघि सारेको छ । वडा तहमा क्रियाशील राजनीतिक दलका पदाधिकारी, स्थानीय अगुवा तथा प्रबुद्ध व्यक्तिहरूलाई निर्वाचनका सबै प्रक्रियामा सहभागी गराएर अपनत्व र विश्वास अभिवृद्धि गर्ने योजना अघि बढाइएको हो ।

यसका लागि गृह मन्त्रालयले ‘सुव्यवस्थित निर्वाचन व्यवस्थापनका लागि वडा तहसम्म समन्वय र सहकार्य अभिवृद्धि गर्ने सम्बन्धी अवधारणा, २०८२’ तयार गरी जिल्ला प्रशासन कार्यालयहरूलाई निर्देशन पठाइसकेको छ । मन्त्रालयका प्रवक्ता आनन्द काफ्लेले वडा तहमा रहेका राजनीतिक व्यक्ति, पदाधिकारी तथा प्रबुद्ध व्यक्तिलाई निर्वाचन व्यवस्थापनमा सहभागी गराएर स्वतन्त्र, निष्पक्ष र भयरहित वातावरण निर्माण गर्ने उद्देश्यले अवधारणा तयार गरिएको बताए ।

यसको कार्यान्वयनको जिम्मेवारी प्रमुख जिल्ला अधिकारी र जिल्ला सुरक्षा समितिका पदाधिकारीलाई दिइएको छ । कार्यान्वयनको अनुगमन गृह मन्त्रालय र सुरक्षा निकायका केन्द्रीय कार्यालयले गर्नेछन् । अवधारणाअनुसार वडा तहमा रहेका सरोकारवालाको पहिचान गरी सूची तयार गर्ने, मतदानस्थलको स्थलगत निरीक्षणका क्रममा उनीहरूसँग बैठक आयोजना गर्ने, आवश्यकताअनुसार टेलिफोन सम्पर्क, समूह एसएमएस, भर्चुअल संवाद र अन्तरक्रिया सञ्चालन गरिनेछ ।

यसैबीच, सशस्त्र प्रहरी बल नेपालले पनि निर्वाचन सुरक्षालाई उच्च प्राथमिकतामा राखेको छ । काठमाडौंमा आयोजित वरिष्ठ अधिकृत सम्मेलनमार्फत सशस्त्र प्रहरी नेतृत्वले बाहिनीपतिहरूलाई निर्वाचन सुरक्षामा अत्यन्त संवेदनशील भएर लाग्न निर्देशन दिएको छ ।

सशस्त्रका महानिरीक्षक राजु अर्यालले फागुन २१ गते हुने निर्वाचनमा कुनै पनि दलको पक्ष नलिई पूर्ण व्यावसायिक रूपमा खटिन, उम्मेदवारसँग अनावश्यक सम्पर्क नगर्न र निर्वाचनलाई शान्तिपूर्ण तथा निष्पक्ष रूपमा सम्पन्न गराउन विशेष सतर्कता अपनाउन निर्देशन दिएका छन् । उनले फिल्डमा खटिने कमाण्डरहरूलाई मानवीय क्षति हुन नदिन, अन्य सुरक्षा निकाय तथा सरोकारवाला निकायसँग निरन्तर समन्वय र सहकार्य गर्न विशेष ध्यान दिन आग्रह गरेका छन् ।

सशस्त्र प्रहरी बल निर्वाचन सुरक्षाको दोस्रो घेरामा रहेर परिचालित हुने छ । सरकार र सुरक्षा निकायको संयुक्त तयारीले आगामी फागुन २१ गतेका लागि घोषणा गरिएको निर्वाचनलाई शान्त, सुरक्षित र विश्वासयोग्य बनाउन ठोस आधार तयार भएको बताइएको छ ।

तपाइको प्रतिक्रिया
युरोपबाट रुवान्डासम्म आप्रवासी निष्कासनको नयाँ अभ्यास, पाँच देशको संयुक्त योजना
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
© 2024 Muluki Khabar. All Rights Reserved. Design & Develop By: Indesign Media Pvt. Ltd.