
काठमाडौँ । आगामी २०८२ फागुन २१ गते हुने प्रतिनिधि सभा निर्वाचनका लागि निर्वाचन आयोगले तयारी तीव्र पारेको छ । यसै क्रममा आयोगले निर्वाचन पर्यवेक्षणका लागि राष्ट्रिय र अन्तर्राष्ट्रिय गरी कुल ४० वटा संस्थालाई अनुमति दिएको छ ।
आयोगका प्रवक्ता नारायण प्रसाद भट्टराईका अनुसार अनुमति पाउनेमा ३६ वटा स्वदेशी र ४ वटा विदेशी संस्थाहरू रहेका छन् । बुधबार मात्रै आयोगले ९ वटा नयाँ संस्थालाई अनुमति दिने निर्णय गरेको थियो, जसमा नेपाल उद्योग वाणिज्य महासंघ, नेपाल चेम्बर अफ कमर्स, नाडा अटोमोबाइल्स र नेपाल कानुन समाज जस्ता प्रतिष्ठित संस्थाहरू रहेका छन् ।
निर्वाचनको समानुपातिक प्रणालीतर्फको प्रक्रिया पनि अघि बढेको छ । राजनीतिक दलहरूले बुझाएको उम्मेदवारको बन्दसूचीमाथि अहिले आयोगले छानबिन गरिरहेको छ । संशोधनको समय: उम्मेदवारको क्लस्टर (समूह) नमिलेको खण्डमा दलहरूले आगामी पुस २७ गतेसम्म संशोधन गर्न पाउनेछन्। उम्मेदवारी फिर्ता लिन चाहनेका लागि पुस २८ गतेको समय तोकिएको छ ।
कसैले नाम फिर्ता लिएमा सोही समूहबाट अर्को उम्मेदवार मनोनयन गरी पुस ३० गतेभित्र आयोगमा पेश गरिसक्नुपर्नेछ ।आयोगको कार्यतालिका अनुसार आगामी माघ ४ गते उम्मेदवारहरूको बन्दसूची प्रकाशन गरिनेछ । उक्त सूचीमा रहेका उम्मेदवारहरूको योग्यतामाथि दाबी विरोध गर्नका लागि माघ ५ देखि १० गतेसम्मको समय उपलब्ध गराइनेछ । प्राप्त निवेदनहरूमाथि जाँचबुझ गरी आयोगले माघ २० गते उम्मेदवारको अन्तिम बन्दसूची सार्वजनिक गर्नेछ ।
निर्वाचनको अन्तिम दिन अर्थात् मतदान आगामी फागुन २१ गते बिहान ७ बजेदेखि बेलुका ५ बजेसम्म हुनेछ । आयोगले अनुमति प्राप्त संस्थाहरूलाई अभिमुखीकरण प्रदान गरी पर्यवेक्षकहरूलाई परिचय पत्र वितरण गर्ने तयारी पनि गरिरहेको छ ।

























