नेपाल–जापान सम्बन्धको ७ दशक, राष्ट्रपति पौडेलको टोकियो यात्रा

Share this
710shares
मुलुकी खबर
मुलुकी खबर
clock२०८२ माघ १९, सोमबार ०६:१०

काठमाडौं । नेपाल र जापानबीच कूटनीतिक सम्बन्ध स्थापना भएको ७० वर्ष (७ दशक) पूरा भएको छ । उक्त ऐतिहासिक अवसरमा राष्ट्रपति रामचन्द्र पौडेल मित्रराष्ट्र जापानको औपचारिक भ्रमणका लागि प्रस्थान गरेका छन् ।

द्विपक्षीय सम्बन्धलाई थप सुदृढ बनाउने अपेक्षासहितको यो भ्रमणलाई नेपाल–जापान सम्बन्धको नयाँ चरणतर्फको महत्त्वपूर्ण कदमका रूपमा हेरिएको छ । राष्ट्रपति पौडेल सोमाबार बिहान त्रिभुवन अन्तरराष्ट्रिय विमानस्थलबाट जापानको टोकियोतर्फ प्रस्थान गरेका हुन् ।

उपराष्ट्रपति रामसहायप्रसाद यादव, प्रधानमन्त्री सुशीला कार्की, मन्त्रिपरिषद् सदस्यहरू, सुरक्षा निकायका प्रमुखहरू, नेपाल सरकारका उच्च पदस्थ अधिकारीहरू तथा नेपालका लागि जापानी राजदूतले राष्ट्रपति पौडेललाई औपचारिक रूपमा बिदाइ गरेका थिए । पौडेलको नेतृत्वमा रहेको प्रतिनिधिमण्डलमा उनकी धर्मपत्नी सविता पौडेल, नेपाल सरकारका उच्च अधिकारीहरू तथा राष्ट्रपति कार्यालयका पदाधिकारीहरू सहभागी छन् ।

भ्रमण सकेर राष्ट्रपति पौडेल माघ २१ गते स्वदेश फर्किने कार्यक्रम तय भएको छ । परराष्ट्र मन्त्रालयका अनुसार नेपाल–जापान कूटनीतिक सम्बन्धको ७०औँ वार्षिकोत्सवका अवसरमा जापान सरकारको निमन्त्रणाअनुसार राष्ट्रपति पौडेलले नेपाली प्रतिनिधिमण्डलको नेतृत्व गर्दै जापान भ्रमण गरेका हुन् ।

भ्रमणका क्रममा सोमबार नै जापान सरकारद्वारा आयोजना गरिने विशेष स्वागत समारोहमा राष्ट्रपति पौडेल सहभागी हुने कार्यक्रम रहेको छ । उक्त समारोहलाई नेपाल–जापान सम्बन्धको ७ दशक लामो यात्राको सम्मान र भावी सहकार्यका सम्भावनाहरूको उत्सवका रूपमा लिइएको छ ।

भ्रमण कार्यतालिकाअनुसार माघ २० गते मंगलबार राष्ट्रपति पौडेलले टोकियोस्थित इम्पेरियल प्यालेसमा जापानका सम्राट नारुहितोसँग राजकीय शिष्टाचार भेटवार्ता गर्नेछन् । सोही दिन जापानका प्रधानमन्त्री सुश्री ताकाइची सानाएसँग पनि राष्ट्रपति पौडेलको औपचारिक भेटवार्ता हुने तय भएको छ ।

यी भेटवार्तामा द्विपक्षीय सम्बन्ध, आपसी सहयोग, व्यापार, लगानी, विकास सहायता तथा जनस्तरको सम्बन्ध विस्तारका विषयमा छलफल हुने अपेक्षा गरिएको छ । यसका साथै जापानका विदेश राज्यमन्त्री होरिइ इवाओले पनि राष्ट्रपति पौडेलसँग शिष्टाचार भेटवार्ता गर्ने कार्यक्रम छ ।

राष्ट्रपति पौडेल जापानी व्यावसायिक समुदायसँगको बैठकमा सहभागी भई नेपालमा लगानीका सम्भावना, व्यापारिक सहकार्य र आर्थिक साझेदारीका विषयमा धारणा राख्नेछन् । जापानस्थित नेपाली राजदूतावासले राष्ट्रपति पौडेलको सम्मानमा आयोजना गर्ने स्वागत समारोहमा समेत उनको सहभागिता रहनेछ ।

नेपाल–जापान सम्बन्धको इतिहास लामो र बहुआयामिक छ । अठारौँ शताब्दीको अन्त्यतिरबाट सुरु भएको भनिने आपसी सम्पर्क १९५६ सेप्टेम्बर १ मा औपचारिक कूटनीतिक सम्बन्ध स्थापना भएसँगै संस्थागत रूपमा अघि बढेको हो ।

मित्रता, सद्भाव र सहयोगमा आधारित सम्बन्धले समयक्रममा शिक्षा, स्वास्थ्य, पूर्वाधार, मानव संशाधन विकास र सांस्कृतिक आदानप्रदानजस्ता क्षेत्रमा उल्लेखनीय योगदान दिएको छ । कूटनीतिक सम्बन्ध स्थापनापछि नेपालले सन् १९६५ मा टोकियोमा र जापानले सन् १९६७ मा काठमाडौंमा आफ्ना दूतावास स्थापना गरेका थिए ।

जापानको ओसाकामा नेपालको मानार्थ वाणिज्य दूतावाससमेत सञ्चालनमा रहेको छ । जसले आर्थिक र व्यापारिक सम्बन्ध प्रवर्द्धनमा भूमिका खेल्दै आएको छ । इतिहासकारहरूका अनुसार जापानी बौद्ध भिक्षु रेभ एकाइ कावागुची सन् १८९९ मा पवित्र बौद्ध धर्मग्रन्थहरूको खोजीमा तिब्बत जाने क्रममा नेपाल आएका थिए ।

उनले आफ्ना लेखन र प्रकाशनमार्फत जापानमा नेपालको परिचय गराउँदै लुम्बिनीको धार्मिक र सांस्कृतिक महत्व उजागर गरेका थिए । यसले नेपाल–जापान जनस्तरको सम्बन्धलाई प्रारम्भिक चरणमै जोड्ने काम गरेको मानिन्छ ।

राणा शासनकालमा सन् १९०२ मा ८ जना नेपाली विद्यार्थी उच्च शिक्षाका लागि जापान गएपछि नेपालीहरू जापानी शिक्षा, संस्कृति र प्रविधिसँग अझ नजिक भएको इतिहास छ । त्यसयता उच्चस्तरीय भ्रमण आदानप्रदान, विकास सहयोग र आपसी विश्वासले नेपाल–जापान सम्बन्धलाई निरन्तर सुदृढ बनाउँदै आएको हो ।

राष्ट्रपति पौडेलको जापान भ्रमण औपचारिक कार्यक्रममा सीमित नभएर ऐतिहासिक सम्बन्धको पुनः पुष्टि, भविष्यका सहकार्यका सम्भावनाहरूको खोज र द्विपक्षीय सम्बन्धलाई नयाँ उचाइमा पुर्‍याउने अवसरका रूपमा हेरिएको छ । ७ दशक लामो मित्रतालाई सम्झँदै सुरु भएको भ्रमणले नेपाल–जापान सम्बन्धमा थप ऊर्जा र स्पष्ट दिशा दिने अपेक्षा गरिएको छ ।

तपाइको प्रतिक्रिया
युरोपबाट रुवान्डासम्म आप्रवासी निष्कासनको नयाँ अभ्यास, पाँच देशको संयुक्त योजना
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
© 2024 Muluki Khabar. All Rights Reserved. Design & Develop By: Indesign Media Pvt. Ltd.