निर्वाचनमा एक थोपा पनि रगत बग्नु हुँदैन : प्रधानमन्त्री कार्की

काठमाडौँ। अन्तरिम सरकारकी प्रधानमन्त्री सुशीला कार्कीले आगामी फागुन २१ गते हुने प्रतिनिधिसभा सदस्यको निर्वाचनमा एक जना पनि घाइते हुन नहुने बताएकी छन्। महाराजगन्जस्थित नेपाल प्रहरीको राष्ट्रिय प्रहरी प्रशिक्षण प्रतिष्ठानमा आयोजित प्रहरी निरीक्षकहरूको दीक्षान्त समारोहलाई सम्बोधन गर्दै उनले निर्वाचनको सुरक्षामा विशेष संवेदनशीलता अपनाउन निर्देशन दिएकी हुन्।

‘आसन्न निर्वाचनमा एक थोपा पनि रगत बग्नु हुँदैन,’ प्रधानमन्त्री कार्कीले सम्बोधनका क्रममा बताएकी छन्। १८ महिना लामो तालिम पूरा गरेर कार्यक्षेत्रमा खटिन लागेका ९२ जना प्रहरी निरीक्षकहरूलाई उनले व्यावसायिकता र निष्पक्षताका साथ काम गर्न आग्रह गरेकी छन्। दीक्षित हुने १८३ औँ समूहका इन्स्पेक्टरहरूमा ९ महिला र ८३ पुरुष छन्।

प्रधानमन्त्री कार्कीले नयाँ अधिकृतहरूलाई विगतका कमजोरी नदोहोर्‍याउन र भविष्यमा प्रहरी संगठनलाई अझ व्यावसायिक बनाउन युवा अधिकृतहरूको ठूलो भूमिका रहने बताएकी छन्। कानुन कार्यान्वयनको सिलसिलामा प्रहरीमा अधिकतम शिष्टता र मानवता हुनुपर्नेमा उनले जोड दिएकी छन्।

उनले भनिन्, ‘तपाईंहरूको निष्पक्षता नै लोकतन्त्रको सुरक्षा कवच हो।’ चुनावलाई भयरहित र शान्तिपूर्ण बनाउन सुरक्षा निकायले कडा मिहिनेत गर्नुपर्ने उनको भनाइ थियो।